دارىندى بالالار مەكتەبىنە وقۋشىلار ىرىكتەۋدى وزگەرتۋ كەرەك - ۆيتسە-مينيستر

قاسكەلەڭ. قازاقپارات - ق ر ءبىلىم جانە عىلىم ۆيتسە-ءمينيسترى اسحات ايماعامبەتوۆ دارىندى بالالارعا ارنالعان مەكتەپ ديرەكتورلارى مەن پەداگوگتارىمەن كەزدەسۋ بارىسىندا دارىندى بالالاردى ىرىكتەۋ ەرەجەسىن وزگەرتۋ كەرەكتىگىن ايتتى، دەپ حابارلايدى قازاقپارات ءتىلشىسى.

قازاقستاندا بۇگىندە دارىندى بالالارعا ارنالعان 131 مەكتەپ بار ەكەن.

«مەن وسى مەكتەپتەردە بالا قابىلداۋ ەرەجەسىن وزگەرتۋدى ۇسىندىم. مينيستر قابىل الدى. ءبىز مەريتوكراتيالىق قاعيدانى قالىپتاستىرۋدى ۇسىنامىن. بۇل مەكتەپتەرگە ىرىكتەۋ تۋرا نازاربايەۆ زياتكەرلىك مەكتەپتەرىندەگىدەي بولۋى ءتيىس. بالالاردى ىرىكتەگەن كەزدە وعان ەشكىمنىڭ ىقپالى بولماۋى كەرەك. تيپتىك ەرەجەلەرگە وزگەرىس ەنگىزۋ كەرەك. جۇمىس توبىن قۇرىڭىزدار، ۇسىنىس كۇتەمىز»، - دەدى اسحات ايماعامبەتوۆ.

ۆيتسە-مينيستر وقۋشىلارعا ارنالعان وليمپيادالار مەن كونكۋرستاردىڭ ورتاق كۇنتىزبەسىن جاساۋدى ۇسىندى.

«بۇل بايقاۋلاردىڭ بارلىعى كۇنتىزبەدە تىركەلۋى ءتيىس. اقىلى بايقاۋلار تۋرالى اقپارات تا اشىق بولۋى كەرەك. ءار اتا- انا، ءار بالا بايقاۋ تۋرالى تولىق اقپاراتپەن قامتىلۋى ءتيىس»، - دەدى ول.

مينيستر ينتەرنەت-وليمپيادالاردىڭ دا ناتيجەسى وبەكتيۆتى ەمەستىگىن ايتتى.

«ينتەرنەت- وليمپيادا سۇراقتارىنا بالا ءوزى جاۋاپ بەرىپ وتىرعانىنا كوز جەتكىزۋ قيىن. ۇيىمداستىرۋشىلار مەكتەپكە كەلىپ، اتا-انالاردى، ۇستازداردى اقىلى وليمپياداعا قاتىسۋعا ۇگىتتەيدى. كەلىسكەن اتا-انالار كەيىن بىردەڭە دۇرىس بولماسا، بىزگە ارىزدانادى. تەك قانا مينيسترلىكتە اتتەستاتتاۋدان وتكەن بايقاۋلارعا عانا قاتىسۋعا بولادى. ال ايدالاداعى تيۋمەندە ءبىر بولمەلى پاتەردە وتكىزىلەتىن وليمپيادانىڭ سەرتيفيكاتتارى قابىلدانبايدى»، - دەدى اسحات ايماعامبەتوۆ.