قازاقستانعا ءتورتىنشى مۇناي وڭدەۋ زاۋىتى قانشالىقتى قاجەت؟
«ءتورتىنشى مۇناي وڭدەۋ زاۋىتى قۇرىلىسى تۋرالى باستاما جانار-جاعارماي تاپشىلىعىنا قاتىستى ماسەلە تۋىنداعان كەزدە كوتەرىلدى. ارينە، ماسەلەنى قاراستىرعان كەزدە، قاجەتتى كولەمدى وندىرەتىن ءوندىرىس بويىنشا سۇراقتار بولاتىنى انىق. قازىرگى كەزدە ەنەرگەتيكا مينيسترلىگىندە قانداي قۋات دەڭگەيى قاجەت ەكەنى جانە زاۋىتتى قايدا ورنالاستىرۋ ماسەلەسى پىسىقتالىپ جاتىر. سونىمەن بىرگە، بۇل زاۋىتقا ءتيىستى جۇكتەمەنى قويۋ قاجەتتىگى بار. ال جۇكتەمەنى بەلگىلەۋ ءۇشىن، الدىمەن، شيكىزاتقا بايلانىستى شارالاردى شەشۋ كەرەك. ياعني بۇنىڭ ءوزى وڭاي ەمەس شارۋا»، - دەدى بريفينگتە ر. قابجانوۆ.
وسى ورايدا ول قازاقستاندا مۇناي جەتكىلىكتى ەكەنىن، الايدا ءاربىر مۇناي كولەمى جوباعا ەنگىزىلگەنىن ءارى شارتپەن بەكىتىلگەنىن اتاپ ءوتتى. سايكەسىنشە، كەن ورنىن پايدالانۋشىلار وزدەرىنە جۇكتەلگەن مىندەتتەمەلەرىن ورىنداۋى ءتيىس.
«ءتورتىنشى زاۋىتتىڭ قۇرىلىسى تۋرالى ماسەلەنى شەشۋ كەزىندە وسى اسپەكتىلەرگە ءمان بەرۋ قاجەت. وزدەرىڭىز بىلەسىزدەر، پرەزيدەنت تاپسىرما بەردى، وسى ورايدا بۇل مىندەتتەر پىسىقتالىپ جاتىر. اتاپ ايتقاندا، ءبىزدىڭ نارىقتى ەسكەرە وتىرىپ، قازاقستان اۋماعىنا ۇلكەن زاۋىتتى سالۋ - ول ەلەۋلى قارجىنى قاجەت ەتەدى. سونىمەن قاتار قولدانىستاعى زاۋىتتاردى جاڭعىرتۋ جۇمىستارىنا دا قوماقتى قارجى جۇمسالدى. قازىرگى كەزدە تەحنيكالىق جانە ەكونوميكالىق ەسەپتەۋلەردى اياقتاۋ كەرەك. بۇدان كەيىن باسشىلىق ءتيىستى شەشىمىن جاسايدى»، - دەدى رۇستەم قابجانوۆ.
