الماتىنىڭ جەراستى جولدارى قالاي وزگەردى؟

الماتى. قازاقپارات - الماتىدا بارلىق جەراستى وتپەلى جولدارىن كۇردەلى جوندەۋدەن وتكىزۋ جۇمىستارى اياقتالىپ قالدى، دەپ حابارلايدى قازاقپارات ءتىلشىسى.

قالا اكىمى باۋىرجان بايبەك جاڭارعان جەراستى وتپەلى جولدارىن قاراپ شىقتى.

قازىر جەراستى دالىزدەرىندە ديودتى جارىق كوزدەرى مەن قوزعالىس قۇرىلعىلارى، دىبىس ديناميكالارى ورناتىلعان. وتپەلى جولداردىڭ توبەلەرى ارنايى جانبايتىن ماتەريالداردان جاسالسا، قابىرعالارى اشىق ادەمى سۋرەتتەرمەن بەزەندىرىلگەن.

ۇلتتىق كىتاپحانا جانىنداعى اباي مەن ابىلايحاننىڭ بۇرىلىسىنداعى جەراستى وتپەلى جولدىڭ قابىرعالارىنا قازاق اقىنى جانە اعارتۋشىسى اباي قۇنانبايەۆتىڭ ناقىل سوزدەرى جازىلعان.

رەسپۋبليكا سارايىنا قارسى ورنالاسقان جەراستى وتپەلى جولدىڭ قابىرعاسىندا «جەتى قازىنا» اتتى قازاق كوشپەندىسىنىڭ جەتى بايلىعى كورىنىس تاپقان.

«قاۋىپسىز قالا» باعىتى اياسىندا جەراستى وتپەلى جولعا جاڭا سيپاتتاعى بىرنەشە ۆيدەوكامەرالار ورناتىلعان. جاڭا كامەرالار ادامنىڭ ءجۇزىن انىقتاۋعا مۇمكىندىك بەرەدى.

اكىم باۋىرجان بايبەك قالا تۇرعىندارىنان ءسال شىدامدىلىق تانىتۋدى سۇرادى.

«بيىل 160 تان استام كوشە جوندەۋدەن ءوتتى، 600 دەن استام اۋلا اباتتاندىرىلادى. قالانىڭ تاريحي ورتالىعى مودەرنيزاتسيالانۋدا. تەك سوڭعى جىلى عانا 800 شاقىرىم ينجەنەرلىك جەلى جاڭاردى. ارينە، جوندەۋ جۇمىستارىنىڭ قالا تۇرعىندارىنا جايسىزدىق تۋدىرۋى مۇمكىن. مەن ولاردان ءسال عانا شىدامدىلىق تانىتۋدى وتىنەمىن. كوشەلەرگە رەكونسترۋكتسيا جۇرگىزۋ كەزىندە قۇرىلىس ەرەجەسىن ساقتاماعان ءبىرقاتار ءىرى قۇرىلىس ۇيىمدارى ايىپپۇل تولەدى. بارلىق جۇمىستار ساپالى ءارى قىسقا مەرزىمدە اياقتالادى. كەيىن وسى قۇرىلىس كومپانيالارى «قۇرىلىس مادەنيەتىن» يگەرىپ، جوندەۋ جۇمىستارىن قالا تۇرعىندارىنا ەش كەدەرگىسىز جۇرگىزەتىن بولادى»، - دەدى باۋىرجان بايبەك.