تۇركىستان وبلىسىنداعى اۋدان اكىمىنىڭ ۇستالعانى تۇسىرىلگەن ۆيدەو پايدا بولدى
مۇنىڭ الدىندا اكىمدى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ كوررۋپتسياعا قارسى ۇلتتىق بيۋرو قىزمەتكەرلەرى پارا الىپ جاتقان كەزىندە ۇستاعانى حابارلانعان.
«تۇركىستان وبلىسىنىڭ انتيكوررۋپتسيالىق قىزمەتىنە جەكە ۇيىمداردىڭ ءبىرىنىڭ وكىلى اكىمنىڭ تاراپىنان قۇقىقبۇزۋشىلىق بولعانىن حابارلاعان. دالەلدەر بويىنشا، ارىز بەرۋشى جۇمىس ىستەيتىن جەكە ۇيىم ساۋىردە مەملەكەتتىك ساتىپ الۋدا 2,2 ميلليون تەڭگە جەڭىپ العان. جۇمىس ىستەۋ بارىسىندا كۇدىكتى ارىز بەرۋشىگە قوسىمشا 2,1 ميلليون تەڭگەگە كەلىسىمشارت جاساسۋدى ۇسىنعان. ول قاراجات ۇنەمدەلگەن بيۋجەت ەسەبىنەن الىناتىن بولعان جانە بۇل كەلىسىمشارتقا كەيىن كەلىسىم بەرىلدى»، - دەپ حابارلادى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى نۇرلان جاحين.
«ورداباسى اۋدانىنىڭ اكىمى جۇمىستان كەتكەننەن كەيىن ۇيىمعا بيۋجەت قاراجاتىنىڭ تۇسۋىنە بايلانىستى اۋرە-سارساڭ پايدا بولدى. اكىمشىلىك عيماراتىنىڭ ماڭىندا جايعاسۋ مەن كەدەرگىسىز بارلىق قاراجاتتى اۋدارۋ ءۇشىن اكىم ۇيىم وكىلىنەن 200 مىڭ تەڭگە پارا سۇراعان. قازىرگى كەزدە اكىم كىناسىن مويىنداپ، وكىنىشىن ءبىلدىردى. ول وزىنە قاتىستى قىلمىستىق ءىستى اياقتاپ، سوتقا دەيىنگى تەرگەۋدى شۇعىل تارتىپپەن وتكىزۋدى سۇرادى. وسىعان بايلانىستى كۇدىكتى قوعامعا قاۋىپ توندىرمەيدى دەگەن نەگىزدە قاماۋعا الىنبادى»، - دەپ حابارلادى نۇرلان جاحين.
مۇنىمەن قاتار، مەملكەتتىك قىزمەت ىستەرى مەن سىبايلاس جەمقورلىققا قارسى ءىس-قيمىل اگەنتتىگى جامبىل وبلىسى اكىمدىگىنىڭ جەرلەردى پايدالانۋ جانە قورعالۋىن باقىلاۋ باسقارماسىنىڭ باسشىسىنىڭ ۇستالعان ءساتى تۇسىرىلگەن ۆيدەونى جاريا ەتتى.
ەسكە سالا كەتەيىك، شەنەۋىك وسىعان دەيىن جامبىل وبلىسىنىڭ شارۋا قوجالىقتارىنىڭ ءبىرىنىڭ جەتەكشىسىنەن جەر ۋچاسكەسىن ءتيىستى تىركەۋگە كومەكتەسكەنى ءۇشىن الدىن الا كەلىسىلگەن 50 مىڭ دوللاردان ەكى ميلليون تەڭگە كولەمىندەگى پارانىڭ ءبىر بولىگىن الدى دەگەن كۇدىككە ءىلىنىپ وتىر.
ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتىنشە، 2018-جىلدىڭ 27- شىلدەسىندە جاسىرىن تەرگەۋ ارەكەتتەرىنىڭ ناتيجەلەرى بويىنشا باسقارما باسشىسى اشكەرەلەنگەن.
