بانك قوسىمشالارى ارقىلى اقشا ۇرلايتىن ۆيرۋستار كۇرت كوبەيدى

زيان كەلتىرۋشى ترويان ۆيرۋستارى سمارتفونعا ەنگەن بويدا ىشىندەگى بارلىق فايلدى زاقىمداۋ ارەكەتىنە كىرىسەدى. ول ءتىپتى تەلەفونداعى موبيلدى بانك قوسىمشالارىنا، تاكسي شاقىرتۋ باعدارلامالارىنا، الەۋمەتتىك جەلى قوسىمشالارىنا اسەر ەتۋگە قاۋقارلى. ۆيرۋس قوسىمشاعا قولدانۋشى لوگين مەن قۇپيا ءسوزدى ەنگىزگەن كەزدە كىرىپ، سول مەزەتتە شوتتاعى قارجىنى جىمقىرۋعا تىرىسادى. مامانداردىڭ ايتۋىنشا، Android وپەراتسيالىق جۇيەسى كوپ جاعدايدا ترويان ۆيرۋستارىنا قارسى تۇرا المايدى ەكەن. تروياندار بۇل وپەراتسيالىق جۇيەگە بىردەن باس سالىپ، ەنىپ كەتەدى. سونىمەن قاتار، قولدانۋشىنىڭ جەكە شوتىنان ۇرلانعان قارجىنىڭ قايتارىلۋى ەكىتالاي شارۋا. سەبەبى، ۇرلىق كەزىندەگى بارلىق جاۋاپكەرشىلىك قولدانۋشىنىڭ وزىنە جۇكتەلەدى. ءموبيلدى قۇرىلعىنى قولدانۋشىنىڭ ۆيرۋسقا قارسى تۇرار ارنايى باعدارلاما ورناتپاعانىنا بانك جاۋاپ بەرمەيدى.

ماماندار بۇنداي كيبەرشابۋىلدان قورعانۋ ءۇشىن وپەراتسيالىق جۇيەگە وزگەرتۋلەر ەنگىزىلگەن كەزدە ۇنەمى جاڭارتىپ وتىرۋ كەرەكتىگىن ەسكەرتەدى. سوڭعى نۇسقاداعى وپەراتسيالىق جۇيە اقشا ۇرلاۋعا پايدالانىلاتىن ۆيرۋستىڭ قۇرىلعى ىشىنە ەنبەۋىنەن ساقتايدى. سونىمەن قاتار، جۇكتەلگەن قوسىمشالاردى دا ۇنەمى جاڭارتىپ وتىرۋ كەرەك جانە قوسىمشانى تەك Google Play, App store سياقتى رەسمي ماركەتتەردەن جۇكتەۋ كەرەك. قوسىمشا ەسكەرتە كەتەتىن تاعى ءبىر دەرەك، قۇپيا ءسوزدىڭ قىسقا ءارى وڭاي بولۋى دا ۆيرۋستاردىڭ جۇمىسىن جەڭىلدەتەتىنى بەلگىلى. سول سەبەپتى، قۇپيا ءسوزدى جازعاندا ارىپتەرمەن قاتار سانداردى، سيمۆولداردى دا ەنگىزۋ كەرەك. تەك قوسىمشانىڭ قۇپيا ءسوزى عانا ەمەس، تەلەفوننىڭ دا كىلت ءسوزى نەعۇرلىم قيىنىراق بولعانى دۇرىس. وسى ارەكەتتەردى ورىنداۋ ارقىلى ترويان ۆيرۋستارىنىڭ شابۋىلىن توقتاتۋعا بولادى.

Massaget.kz