الماتىلىقتار قالا كوشەلەرىن جوندەۋگە ۇلەس قوسا الادى
وتىنىشتەر بيىلعى قىركۇيەك ايىنا دەيىن قابىلدانادى. جوندەۋ بويىنشا ۇسىنىستاردى zhol.almaty@a-a.kz ارنايى سايتىنا «جولعا جوندەۋ جۇمىستارى قاجەت» نەمەسە «تروتۋار كەرەك» بەلگىسىمەن جىبەرۋگە بولادى.
الماتىدا سوڭعى ءۇش جىل ىشىندە جالپى ۇزىندىعى 500 شاقىرىمدى قۇرايتىن 524 كوشە جوندەۋدەن ءوتتى.
بيىل قالا بويىنشا ورتاشا دەڭگەيدەگى جوندەۋ جۇمىستارى جالپى ۇزىندىعى 155 شاقىرىمدى قۇرايتىن 157 كوشەدە جۇرگىزىلدى.
«كوشە-جول جەلىلەرىندە ورتاشا جوندەۋ جۇمىستارىن جۇرگىزۋ كەزىندە مەردىگەرلەرگە 3 جىل بەرىلەتىنىن ايتا كەتۋ كەرەك. وسى ۋاقىت ارالىعىندا ۇيىم ءوز قاراجاتىنا كەز كەلگەن اقاۋلار مەن كەمشىلىكتەردى قايتا قالپىنا كەلتىرۋى ءتيىس. الماتى قالاسى اكىمىنىڭ تاپسىرماسىمەن تروتۋارلار مەن ارىقتاردى جوندەۋگە كوپ كوڭىل ءبولىندى»، - دەدى تيمۋر بازاربايەۆ.
سونداي-اق، جاڭا ءۇش كولىك ايىرىقتارىن سالۋ، بىرنەشە كوشەلەردى قايتا قۇرۋ جانە اۆتوبۋستىق دالىزدەردى جاساۋ بويىنشا جۇمىستار اتقارىلۋدا. بۇدان بولەك، كوپىرلەر كەڭەيتىلىپ جاتىر.
جولاۋشىلار كولىگى مەن اۆتوموبيل جولدارى باسقارماسى 123 كوشەدەگى جول-كولىك جۇمىستارىن اياقتادى. 25 تامىزعا دەيىن قالانىڭ قالعان 34 كوشەسىندەگى ورتاشا جوندەۋ جۇمىستارى اياقتالادى.
سونداي-اق، تيمۋر بازاربايەۆ ەنەرگەتيكا جانە كوممۋنالدىق شارۋاشىلىق باسقارماسى 800 شاقىرىمداي ينجەنەرلىك جەلىلەردى قايتا جوندەگەنىن جانە سالعانىن ءمالىم ەتتى.
جولاۋشىلار كولىگى جانە اۆتوموبيل جولدارى باسقارماسى 2016 -جىلى ورتاشا جوندەۋ اياسىندا 196 كوشەدەگى 140 شاقىرىم جول جابىنىن جاڭارتتى. قازىرگى تاڭدا بارلىق ماگيسترالدىق كوشەلەردە جانە جەرگىلىكتى جولداردىڭ 80 پايىزىندا جوندەۋ جۇمىستارى ءجۇرىپ جاتىر. جاياۋ جۇرگىنشىلەر ءۇشىن ۇزىندىعى 30,5 شاقىرىم تروتۋار جاسالدى.
