ۇلى جىبەك جولى ەلدەرىنىڭ ورتاق ۆيزاسىن ازىرلەۋ كەرەك - مادەنيەت جانە سپورت مينيسترلىگى

استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلى ۇلى جىبەك جولى ەلدەرىنىڭ ورتاق تۋريستىك ۆيزاسىن ازىرلەۋدى ۇسىندى، دەپ حابارلايدى قازاقپارات ءتىلشىسى.

«ەجەلدەن قازاقستان ۇلى جىبەك جولىنىڭ اينىماس بولشەگى بولدى جانە 2015 -جىلى بودرۋمدا وتكەن تۇركى كەڭەسىنە مۇشە مەملەكەت باسشىلارىنىڭ ءتورتىنشى سامميتىندە قازاقستان «تۇركى كەڭەسى: زاماناۋي جىبەك جولى» تۋريستىك ءونىمىن ازىرلەيتىن جۇمىس توبىنىڭ ۇيلەستىرۋشىسى اتاندى. وسىعان بايلانىستى سوزدەن ىسكە كوشىپ، تۋريزم بويىنشا ناقتى شەشىمدەردى قىرعىزستاندا وتەتىن تۇركىتىلدەس مەملەكەت باسشىلارىنىڭ كەزەكتى سامميتىنە ۇسىنۋىمىز كەرەك»، - دەدى ارىستانبەك مۇحامەدي ۇلى استانادا تۇركى كەڭەسىنە مۇشە مەملەكەتتەرى تۋريزم جونىندەگى مينيسترلەرىنىڭ ءتورتىنشى كەزدەسۋىندە.

مۇحامەدي ۇلى ءوز سوزىندە ۇلى جىبەك جولى ەلدەرىنىڭ ۆيزالىق رەجيمىن وڭتايلاندىرۋ ماسەلەسىن كوتەردى.

«ۇلى جىبەك جولى بويىنشا تۇركى كەڭەسى بەكىتكەن تۋريستىك باعىتقا ورتاق ۆيزالىق رەجيم ماسەلەسىن شەشۋىمىز قاجەت. تۋريستىك ماقساتتاعى «ۇلى جىبەك جولى» ۆيزاسى ەۋروپا ەلدەرىنە ورتاق «شەنگەن» ۆيزاسىنىڭ بالاماسى بولار ەدى. وسىلايشا، شەتەلدىك تۋريستەرگە ەجەلگى قالالارىمىزدى كورسەتىپ، ۇمىتىلماس اسەر سىيلاي الامىز»، - دەدى مينيستر.

ءمينيستردىڭ ايتۋىنشا، قازاقستان قازىرگى ۋاقىتتا ۆيزالىق- ميگراتسيالىق رەجيمدى ىرىقتاندىرۋعا كوڭىل ءبولىپ وتىر.

«بۇگىندە 61 مەملەكەتتىڭ ازاماتتارى قازاقستاندىق ۆيزانى الۋدان بوساتىلدى. ودان بولەك، 48 ەلدىڭ ازاماتتارىنا تۋريستىك ۆيزا بەرەردە شاقىرۋدى راسىمدەۋ تالاپ ەتىلمەيدى. قىتاي ازاماتتارىنا توپتىق تۋريستىك ۆيزالار بەرۋ قولعا الىندى. ءدال وسىنداي كەلىسىم يران مەملەكەتىمەن جۇرگىزىلىپ جاتىر. استانا مەن الماتى اۋەجايلارىندا قىتاي مەن ءۇندىستان ازاماتتارىنا 72 ساعاتتىق ترانزيتتىك ۆيزا بەرىلەدى»، - دەپ ەسكە سالدى ارىستانبەك مۇحامەدي ۇلى.

ايتا كەتەيىك، 2018 -جىلدىڭ 3 - قىركۇيەگىندە قىرعىزستاننىڭ شولپان اتا قالاسىندا تۇركىتىلدەس مەملەكەتتەر باسشىلارىنىڭ كەزەكتى ءسامميتى وتەدى. سامميت 2-8 - قىركۇيەكتە شولپان اتادا وتەتىن ءۇشىنشى دۇنيەجۇزىلىك كوشپەندىلەر ويىنى اياسىندا ۇيىمداستىرىلماق.

تۇركى ىنتىماقتاستىق كەڭەسى 2009 -جىلى قۇرىلعان بولاتىن. ونىڭ قۇرامىنا قازاقستان، تۇركيا، ازەربايجان مەن قىرعىز رەسپۋبليكاسى كىرەدى. قىرعىزستاندا وتەتىن كەلەسى وتىرىسقا وزبەكستان رەسپۋبليكاسى دا قاتىسادى.

اۆتور: ايجان سەرىكجان قىزى