ا ق ش- تىڭ يراننىڭ يادرولىق باعدارلاماسىنان شىققانى وكىنىشتى - گۇلشارا ءابدىقالىقوۆا

استانا. قازاقپارات - ق ر مەملەكەتتىك حاتشىسى گۇلشارا ءابدىقالىقوۆا يراننىڭ قازاقستانداعى توتەنشە جانە وكىلەتتى ەلشىسى مودجتابا داميرچيلۋمەن كەزدەستى. ەلشىنىڭ ديپلوماتيالىق ميسسياسى اياقتالىپ وتىر، دەپ حابارلايدى قازاقپارات ءتىلشىسى.

 ءوز سوزىندە گ. ءابدىقالىقوۆا ەلشىنىڭ قىزمەتى ءۇشىن العىس ءبىلدىرىپ، وسى ۋاقىتتىڭ ىشىندە ءبىراز شارالاردىڭ اتقارىلعانىن جەتكىزدى. «يراننىڭ پرەزيدەنتى بىرنەشە رەت كەلىپ كەتتى. ءبىزدىڭ ەلباسىمىز دا ساپارمەن باردى. سول كەزدە يندۋستريالدىق- يننوۆاتسيالىق جانە ساۋدا- ەكونوميكالىق كەلىسىمدەرگە قول قويىلدى. جوبالاردىڭ جالپى قۇنى - 1,3 ميلليارد تەڭگە. قازىرگى كەزدە وسى سالاداعى جۇمىس اتقارىلىپ جاتىر. ال قازاقستان مەن يراننىڭ اراسىنداعى ساۋدا- ساتتىق ءبىر جىلدا 550 ميلليون دوللارعا جەتتى. دەگەنمەن، ون جىل بۇرىن اتالعان كورسەتكىش 2 ميلليارد دوللار بولعان. سوندىقتان ءالى دە ءبىراز جۇمىس جاساۋ قاجەت. يران مەن ەۋرازيالىق ەكونوميكالىق وداق اراسىندا ۋاقىتشا ساۋدا ايماعىن قۇرۋ تۋرالى كەلىسىم راسىمدەلگەن بولاتىن. سونىڭ اياسىندا ەكىجاقتى ساۋدا اينالىمى ارتادى دەگەن ءۇمىت بار»، - دەدى گ. ءابدىقالىقوۆا.

بۇدان بولەك، مەملەكەتتىك حاتشى يراننىڭ يادرولىق باعدارلاماسىنا دا توقتالدى. «وكىنىشكە قاراي، ا ق ش يراننىڭ يادرولىق باعدارلاماسىنان شىعىپ كەتتى. بىزدىڭشە، اتالعان ماسەلەلەر ديپلوماتيالىق جولمەن شەشىلۋى كەرەك. ارينە، باسقا مەملەكەتتەردىڭ ول كەلىسىمدى قولداپ وتىرعانى ءبىزدى قۋانتادى. قازاقستان وسى قۇجاتتى ازىرلەۋ شارالارىنا بەلسەنە اتسالىستى. سوندىقتان ءبىز كەلىسىمنىڭ ارى قاراي ىسكە اسۋىنا مۇددەلىمىز»، - دەپ اتاپ كورسەتتى گ. ءابدىقالىقوۆا.

ەلشى مودجتابا داميرچيلۋ قازاق حالقىنىڭ قوناقجايلىلىعى ءۇشىن العىس ءبىلدىرىپ، قازاقستاندى قيماي قوشتاسىپ جاتقانىن جەتكىزدى. «وسى ۋاقىتتىڭ ىشىندە قازاقستان مەنىڭ ەكىنشى ءۇيىم بولىپ كەتتى. دەگەنمەن، ديپلوماتيالىق ميسسيامنىڭ اياقتالۋىنا بايلانىستى ءوز ەلىمە قايتۋىم قاجەت»، - دەدى م. داميرچيلۋ. ونىڭ ايتۋىنشا، ءتورت جىلدىڭ ىشىندە قازاقستان مەن يران اراسىنداعى ساۋدا- ەكونوميكالىق بايلانىستار جاندانا ءتۇستى. وعان ەكى ەل باسشىلارىنىڭ ءوزارا ساپارلارى ۇلكەن سەرپىن بەردى. «اسىرەسە، كولىك سالاسىن ەرەكشە اتاپ وتكەن ءجون. بىزدە تەمىرجول بولسىن، اۆتوموبيل جولدارى بولسىن، جۇك تاسىمالى بويىنشا ءبىراز شارالار اتقارىلدى. سوسىن ەكى ەلدىڭ ساۋدا پالاتاسىن قۇردىق. ءسوز جوق، ول دا ءوز ۇلەسىن قوسىپ كەلەدى»، - دەپ اتاپ كورسەتتى م. داميريچيلۋ.

اۆتور: ارمان اسقاروۆ