جارق ەتىپ سونگەن: زور تابىسقا جەتىپ، ومىرمەن ەرتە قوشتاسقان سپورتشىلار كىمدەر؟
NUR. KZ نازارلارىڭىزعا از عانا عۇمىرىندا وزىنەن كەيىن وشپەس ءىز قالدىرعان سپورتشىلار ءتىزىمىن ۇسىنادى.
بار-جوعى 25 جاسىندا باقيلىق بولعان سپورتشىلاردىڭ ءبىرى، فۋتبودان نيگەريا جاستار قۇراماسىنىڭ ويىنشىسى - ەندۋرانس يداحور. 2016-جىلدىڭ ناۋرىز ايىندا ول ادەتتەگىدەي «ال-امالي» كومانداسىمەن سۋدان كۋبوگىن ساراپقا سالاتىن ويىنعا فۋتبول الاڭىنا شىعادى.
ويىننىڭ ەكىنشى تايمىندا فۋتبولشى ءوزىن جايسىز سەزىنىپ، ويىن الاڭىندا ەسىنەن تانىپ قالادى. وسىلايشا، فۋتبولشى جەدەل-جاردەم كولىگىندە جان تاپسىرادى. كەيىن سپورتشىنىڭ جۇرەك تالماسىنان كوز جۇمعانى بەلگىلى بولادى.
ومىرمەن قوش ايتىسقان سپورتشىلاردىڭ اراسىندا وكىنىشكە وراي، ءبىزدىڭ ەلدىڭ دە سپورت جۇلدىزدارى بار. سولاردىڭ ءبىرى - دەنيس تەن. وتكەن ايدىڭ 19-شىلدەسىندە مەيرامحانادان تاماقتانىپ شىققان ول، بەلگىسىز بىرەۋلەردىڭ كولىك ايناسىن ۇرلاماق بولعانىنىڭ كۋاسى بولادى. بەيتانىس جىگىتتەرمەن سوزگە كەلگەن سپورتشىنى الاياقتار سول جەردە پىشاقتاپ كەتەدى. سوچي وليمپياداسىنىنىڭ قولا جۇلدەگەرى، مانەرلەپ سىرعاناۋشى سول كۇنى كەشكى ساعات 17:00 دە ەسىن جيماستان، قايتىس بولادى.
نەبارى 20 جاسىندا بوكستان وليمپيادا چەمپيونى اتانىپ، وزىنەن كەيىن وشپەس ءىز قالدىرعان قازاقستاندىق سپورتشىلاردىڭ ءبىرى - بەكزات ساتتارحانوۆ. سيدنەي وليمپياداسىندا التىننان القا تاققان بوكسشى، 2000-جىلدىڭ 31- جەلتوقسانىندا جول اپاتىنان كوز جۇمدى.
شارشى الاڭدا جۇدىرىقتاسىپ، كوماعا تۇسكەن بوكسشىنىڭ ءبىرى - دجونني وۋەن. 1980-جىلى جەڭىل سالماقتا الەم چەمپيوندىعى اتاعى ءۇشىن، لۋپە پەنتورمەن جەكپە-جەككە تۇسكەن ول شارشى الاڭدا نوكاۋتقا تۇسەدى. كەيىن كومادا جەتى اپتا جاتقان بوكسشى كوپ ۇزاماي كوز جۇمادى. 24 جاسىندا ومىردەن وزعان دجونني وۋەن از عانا عۇمىرىندا ەۋروپا، ۇلى بريتانيا چەمپيونى بولىپ ۇلگەرگەن ەدى.
24 جاسىندا ومىرمەن قوش ايتىسقان كەلەسى ءبىر سپورتشى - يتاليالىق موتوشەبەر ماركو سيمونچەللي. سپورتشى 2011-جىلدىڭ 23- قازانىندا الەم چەمپيوناتىنىڭ سوڭعى اقتىق سىنىندا تىكەلەي ەفير بارىسىندا كوز جۇمعان. سپورتشى ءوزى تىزگىندەگەن موتوسيكلعا يە بولا الماي، جارىسقا قاتىسۋشىلاردىڭ كولىگىمەن سوقتىعىسقان. جاس سپورتشى وقيعا ورنىندا ءتىل تارتپاي كەتكەن.
33 جاسىندا ومىردەن وزعان حوككەيشىلەردىڭ ءبىرى ايگىلى - ۆالەري حارلاموۆ. مۇز ايدىنىنىڭ ھاس شەبەرى 1981-جىلدىڭ 27- تامىزىندا جول اپاتىندا قازا تاپقان. سپورتشى ءوزىنىڭ كولىگىمەن نەمەرە اعاسى جانە جۇبايى يرينامەن بىرگە ماسكەۋگە جولعا شىققان ەكەن. ءبىرشاما جول جۇرگەن سوڭ، ءرولدى ايەلىنە بەرگەن ول، قارسى بەتتە كەلە جاتقان جۇك كولىگىمەن سوقتىعىسىپ، سول جەردە جاقىندارىمەن بىرگە جان تاپسىرادى.
سەرگەي سيمونوۆ رەسەيدىڭ حوككەي قۇراماسىنىڭ ۇزدىك ويىنشىلارىنىڭ ءبىرى بولعان. ويىن الاڭىندا باۋىر تۇسىنىڭ اۋىرعانىن ايتقان سپورتشى، دەرەۋ اۋرۋحاناعا جەتكىزىلەدى. دارىگەرلەر ونىڭ ءوتىنىڭ جارىلىپ كەتكەنىن ءارى ىشكە قان كەتكەنىن ايتىپ، ونىڭ ءومىرىن ساقتاپ قالا المايدى. حوككەيشى بار-جوعى 23 جاسىندا ومىردەن وزادى.
2016-جىلدىڭ 10- قاڭتارىندا فۋتبولدان بەلگيا ۇلتتىق قۇراماسىنىڭ فۋتبولشىسى جۋنيور مالاندا جول اپاتىنان قايتىس بولادى. فۋتبولشى وتىرعان كولىك جۇرگىزۋشىسى قاتتى جىلدامدىقپەن اۋدارىلىپ تۇسەدى. بولاشاعىنان زور ءۇمىت كۇتتىرەتىن جۋنيور 20 جاسىندا وقيعا ورنىندا قازا تابادى. ءتىرى بولعاندا فۋتبولشى بيىلعى رەسەيدە وتكەن الەم چەمپيوناتىنىنا قاتىساتىن ەدى.
