قاسىموۆ دەنيس تەننىڭ ءىسى بويىنشا ۇستالعان ءۇشىنشى ادام تۋرالى ايتىپ بەردى

استانا. قازاقپارات - مانەرلەپ سىرعاناۋشى دەنيس تەننىڭ ولىمىنە قاتىستى ءىس بويىنشا ۇستالعان ءۇشىنشى كۇدىكتى جانار تولىبايەۆا الماتىعا جامبىل وبلىسىنان كەلىپ، داياشى بولىپ قىزمەت اتقارعان.

بۇل تۋرالى ءى ءى م باسشىسى قالمۇحامبەت قاسىموۆ الماتىدا وتكەن جينالىس بارىسىندا ايتىپ بەردى، - دەپ حابارلايدى Tengrinews.kz ءتىلشىسى.

ونىڭ مالىمەتىنشە، قىلمىس 2018-جىلى 19- شىلدەدە 14:56 دا بولعان. «22:30 دا ءبىز ءبىرىنشى قىلمىسكەردى ۇستادىق. سول ارقىلى ءبىز وسى ىسكە قاتىسى بار ءبىر ادامدى انىقتادىق. ءبىرىنشى جاۋاپ الۋ كەزىندە ول بىزگە بارلىعىن ايتا قويعان جوق. ءۇشىنشى قىلمىسكەرمەن جاعداي قيىنداۋ بولدى. ءبىرىنشى ءتۇنىن ول سايدا وتكىزگەن. كەيىن مەكەنجايىن اۋىستىرىپ وتىرعان - ءبىرىنشى ىقشاماۋدان، ەكىنشى ىقشاماۋدان. ونى ۇستاۋ قيىن بولدى. سول سەبەپتى «اقساي» ىقشاماۋدانىندا ارميالىق وپەراتسيا جۇرگىزۋگە تۋرا كەلدى. ۇلتتىق گۆارديا قوسىلدى. 18:40-تا باسقا مەكەن-جايعا اۋىسقالى جاتقاندا ول ۇستالدى.

بۇل ىستەگى ءۇشىنشى ادام - ايەل، ول جامبىل وبلىسىنان. جازدا وسىندا كەلىپ، داياشى بولىپ جۇمىس ىستەگەن. ولار بارلىعى كەزدەسكەن. مىنا ەكەۋى كولىك ايناسىن ۇرلاۋمەن اينالىسقان»، - دەدى ءى ءى م باسشىسى.

2018-جىلى 25- شىلدەدە جانار تولىبايەۆا ەكى ايعا قاماۋعا الىندى. «المالى اۋداندىق سوتى تولىبايەۆاعا قاتىستى قر قىلمىستىق كودەكسىنىڭ 434-بابى («قىلمىس تۋرالى حابارلاماۋ») جانە ق ر قىلمىستىق كودەكسىنىڭ 188-بابى 2-بولىگى 1-تارماعى («ۇرلىق») بويىنشا كۇدىكتى ساناپ، ەكى ايعا قاماۋعا الۋ تۋرالى بۇلتارتپاۋ شاراسىن ماقۇلدادى»، - دەلىنگەن سوت حابارلاماسىندا.

باس پروكۋروردىڭورىنباسارى مارات احمەتجانوۆتىڭ ايتۋىنشا، قىز بالا قىلمىس تۋرالى حابارلاماعانى ءۇشىن كۇدىكتى قاتارىنا ەنگەن. «قاجەتتى دەرەكتەردىڭ بارلىعى جينالدى، قازىرگى ۋاقىتتا پروكۋرور ولاردىڭ زاڭدىلىعىن تەكسەرىپ جاتىر. سول قاماۋعا الۋ تۋرالى بۇلتارتپاۋ شاراسىن بۇيىردى»، - دەدى مارات احمەتجانوۆ.

وسىعان دەيىن نۇرالى قياسوۆ پەن ارمان قۇدايبەرگەنوۆتاردىڭ وسى ىسكە قاتىستى كۇدىكتى رەتىندە ۇستالعانى حابارلاندى. ەكەۋى دە ءومىر بويىنا سوتتالۋى مۇمكىن.

Kaz.tengrinews.kz