استاناداعى جەكە مەكتەپتەردىڭ باعاسى قانداي

استانا. قازاقپارات - جاڭا وقۋ جىلى قارساڭىندا قازاقپارات اگەنتتىگى بالاسىن جەكە مەكتەپكە بەرۋدى جوسپارلاپ جۇرگەن اتا- انالار ءۇشىن ەلوردالىق مەكتەپ باعالارىنا شولۋدى ۇسىنادى.

استانادا جالپى سانى 12 جەكە مەكتەپ بار جانە بيىلعى وقۋ جىلىندا 2 جاڭا مەكتەپ اشىلادى. ولاردىڭ اراسىنداعى ەڭ قىمباتى - Haileybury Astana مەكتەبى. بۇل مەكتەپتە بالانى 1- سىنىپتا وقىتۋ ءۇشىن اتا- انا جىلىنا 6 ميلليون 420 مىڭ 600 تەڭگە تولەۋى ءتيىس.

سونداي- اق، Haileybury Astana مەكتەبىنە ءتۇسۋ ەمتيحانى ءۇشىن 37 مىڭ تەڭگە جانە كەپىلدىك جارنا رەتىندە قوسىمشا 365 مىڭ تەڭگە تولەنۋى ءتيىس.

«ميراس» حالىقارالىق مەكتەبىندە بالانى ءبىرىنشى سىنىپتا وقىتۋ - 3,4 ميلليون تەڭگەگە تۇسەدى. ودان بولەك، قابىلداۋ ەمتيحانى ءۇشىن 25 مىڭ تەڭگە تولەۋ مىندەتتەلەدى. ەگەر ءبىر وتباسىنان ەكىنشى بالا مەكتەپكە قابىلدانسا - وقۋ اقىسىنا 5 پايىز، ال ەگەر ءۇشىنشى بالا قابىلدانسا - 10 پايىز جەڭىلدىك جاسالادى.

«ميراس» مەكتەبىنىڭ فرانسۋز تىلىندەگى سەكسيادا وقۋ اقىسى اناعۇرلىم ارزان - جىلىنا 2,5 ميلليون تەڭگە. ءبىراق، بۇل سەكسيادا ەكىنشى جانە ءۇشىنشى بالانى وقىتۋعا جەڭىلدىكتەر بەرىلمەيدى.

 قۇرىلعانىنا 10 جىلدان اسقان Nurorda مەكتەپ- ليسەيىنىڭ جىلدىق ءبىلىم بەرۋ قىزمەتى 2 ميلليون 210 مىڭ تەڭگەگە باعالانادى.

سونىمەن بىرگە، بيىلعى وقۋ جىلىندا «الپامىس» اتتى جاڭا جەكە مەكتەپ ءوز ەسىگىن ايقارا اشادى. مۇنداعى جىلدىق وقۋ اقىسى - 1,5 ميلليون تەڭگە. بۇل قاراجاتقا وقۋلىقتار مەن ۇيىرمەلەر ەنگەن جانە كۇندەلىكتى ءۇش مەزگىل تاماقتاندىرۋ ءۇشىن اي سايىن قوسىمشا 35 مىڭ تەڭگە تولەۋ قاجەت. ودان بولەك، 150 مىڭ تەڭگە وقۋعا قابىلدانۋ جارناسى بار.

ەلوردالىق «اقبۇلاق» مەكتەبىندە العاشقى وقۋ جىلى ءۇشىن اتا- انا 1 ميلليون 150 مىڭ تەڭگە تولەۋى قاجەت.

«گولۋبوي پارۋس» جەكە مەكتەبىنە قابىلدانۋ ءۇشىن 150 مىڭ تەڭگە جارنا تولەنەدى جانە اي سايىن 127 مىڭ تەڭگەدەن تولەۋ مىندەتتەلەدى. وسىلايشا، 9 ايلىق وقۋ اقىسى - 1 ميلليون 143 مىڭ تەڭگەنى قۇرايدى. كەلەسى وقۋ جىلىنىڭ اقىسىن الدىن الا تولەگەن اتا- اناعا %5 جەڭىلدىك جاسالادى.

 وزگە مەكتەپتەرمەن سالىستىرعاندا، ەكونوميكالىق ليسەيدەگى وقۋ اقىسى اناعۇرلىم ارزان - جىلىنا 700 مىڭ تەڭگە. مۇندا دا 150 مىڭ تەڭگە مەكتەپكە قابىلدانۋ جارناسىن تولەۋ قاجەت جانە قازىردىڭ وزىندە 1-سىنىپ بالالارىن قابىلدايتىن ورىن قالماعان.

بيىلعى جاڭا وقۋ جىلىندا استانادا تاعى ءبىر جەكە مەكتەپ اشىلادى. «بولاشاق» باعدارلاماسىنىڭ تۇلەكتەرى اشقان Astana Garden School تەك قانا 10-11 سىنىپ وقۋشىلارىن عانا قابىلدايدى. مۇنداعى جىلدىق وقۋ اقىسى - 3 ميلليون تەڭگە.

ايتا كەتەيىك، كەي مەكتەپتەردە سىنىپ جوعارىلاعان سايىن وقۋ اقىسى دا قىمباتتاي تۇسەدى. ماسەلەن، «ميراس» حالىقارالىق مەكتەبىندە 11-12- سىنىپ وقۋشىلارى ءۇشىن جىلدىق اقى 5 ميلليون تەڭگەدەن، Haileybury Astana مەكتەبىندە - 9 ميلليون تەڭگەدەن اسادى.

اۆتور: ايجان سەرىكجان قىزى