مينيستر دەنيس تەندى ءولتىردى دەگەن كۇدىكتىلەردىڭ قالاي ۇستالعانىن ايتتى
«الماتىداعى جاعدايدى قالىپقا كەلتىرۋ ءۇشىن بارىنشا جاعداي جاسالىپ جاتىر. پوليتسيا وقيعا ورنىنا دەر كەزىندە شىققان. مەن بۇل جەردە قىلمىستى قالاي اشقانىمىز تۋرالى ايتىپ وتىرمىن. قىلمىس ساعات 14:56-دا بولسا، سول كۇنى كەشكى ساعات 23:30-تە ءبىز كۇدىكتىلەردىڭ بىرەۋىن ۇستادىق» ، - دەدى مينيستر الماتىدا قازاقستان رەسپۋبليكاسى مەن رەسەي فەدەراتسياسى ىشكى ىستەر مينيسترلىگى ارىپتەستىگىنىڭ ءتورتىنشى وتىرىسى بويىنشا وتكەن بريفينگتە.
ونىڭ ايتۋىنشا، ءبىرىنشى ۇستالعان كۇدىكتى ارقىلى ونىڭ سىبايلاسى دا ۇستالعان.
«ءۇشىنشى كۇدىكتىنى ۇستاعان كەزدە قيىندىق تۋدى. قىلمىس بولعان كۇنى تۇندە ول ۇيىندە بولعان. ودان كەيىن مەكەنجايىن اۋىستىرىپ جىبەرەدى. اقساي اۋدانىندا ۇلتتىق گۆارديانىڭ قاتىسۋىمەن وپەراتسيا ۇيىمداستىرۋعا تۋرا كەلدى. ول كەلەسى مەكەنجايعا اۋىسار كەزدە ۇستالدى» ، - دەدى مينيستر.
قازىر كۇدىكتىلەردەن سۇراق- جاۋاپ الىندى. ساراپتامالار جاسالىپ جاتىر.
ەسكە سالساق، قازاقستاندىق مانەرلەپ سىرعاناۋشى دەنيس تەن 19 - شىلدە كۇنى پىشاق جاراقاتىنان قازا بولعان ەدى. وقيعا قۇرمانعازى مەن بايسەيىتوۆا كوشەلەرىنىڭ قيىلىسىندا 19 - شىلدەدە تۇسكى ساعات 15:00 شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنا جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى. ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن.
2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30-دا وليمپيادا جۇلدەگەرى قايتىس بولدى.
ادام ءولتىرۋ بابىمەن قىلمىستىق ءىس قوزعالدى.
كەيىن بەلگىلى بولعانداي، سپورتشىنىڭ ولىمىنە قاتىسى بار ەكى كۇدىكتىنىڭ ءبىرى ۇستالىپ، ول قىلمىسىن مويىندادى. ەكىنشى كۇدىكتى - 1994 -جىلى تۋعان قىزىلوردا وبلىسى، قارماقشى اۋدانى، اقاي اۋىلىنىڭ تۋماسى ارمان قۇدايبەرگەنوۆكە ىزدەۋ جاريالاندى.
سونداي- اق، دەنيس تەننىڭ ولىمىنە كۇدىكتى نۇرالى قياسوۆ كۇزەتپەن المالى اۋداندىق سوتىنا جەتكىزىلگەن.
ال دەنيس تەننىڭ ءولىمى بويىنشا كۇدىكتى ەكىنشى ادام ارمان قۇدايبەرگەنوۆ ۇستالدى.
