قول قويماساڭ، كوزىڭدى قۇرتامىن دەپ قورقىتتى - حراپۋنوۆتىڭ ەكس- ورىنباسارى

الماتى. قازاقپارات - ۆيكتور حراپۋنوۆتىڭ ورىنباسارى زاڭسىز ساتىلىم بارىسىن اشكەرە قىلدى. ول جەر تەلىمدەرى مەن جىلجىمايتىن مۇلىكتىڭ حراپۋنوۆ پەن ونىڭ تۋىستارىنىڭ مەنشىگىنە قالاي وتكەنىن سوتتا ايتىپ بەردى،

دەپ حابارلايدى قازاقپارات ءتىلشىسى.

سوتتالۋشى ياكوۆ زاياتس 1998-2004 -جىلدارى الماتىنىڭ ەكس- اكىمى ۆيكتور حراپۋنوۆتىڭ ورىنباسارى بولىپ قىزمەت اتقارعان. ول ساۋلەت سالاسىندا، جول جوندەۋ، جولايرىقتار سالۋدا جەتەكشىلىك ەتكەن. سونداي- اق جەر قاتىناستارى جانە قالا قۇرىلىسى ماسەلەلەرى جونىندەگى كوميسسيا مۇشەسى بولعان.

 ەمەن باعىن جەكە مەنشىك يەسىنە ساتۋ تۋرالى حاتتاماعا قول قويعان ول جاۋاپ الۋ كەزىندە ىستەگەن ءىسىن مويىنداپ، وكىنىش ءبىلدىردى.

 «ماسەلە بۇل اۋماقتا جىلجىمايتىن مۇلىكتىڭ جالعا بەرىلۋىندە. جىلجىمايتىن مۇلىك ساتىلىپ كەتكەندە، جەر قاتىناستارى كوميسسياسىنىڭ مىندەتى - جەر تەلىمى يەسىن وزگەرتۋ ەدى. بۇرىن بۇل جەر قالالىق اتقارۋشى كوميسسيانىڭ دەمالاتىن ورنى بولاتىن. حراپۋنوۆ مۇنداي شەشىم قابىلداعان كەزدە مەنى شاقىرىپ، بىلاي دەدى: «پارتيالىق وبەكتىلەردىڭ ءبارىن بۇرىنعىداي جەكەشەلەندىرۋ كەرەك. كاسىپوداقتاعىلار شىمبۇلاق پەن مەدەۋدى جەكەشەلەندىردى». مەن تۇبەگەيلى قارسى بولدىم. ول مەنى كوميسسيا قۇرامىنا كۇشتەپ قوستى. مەنىڭ الدىما قول قويىلعان قۇجاتتى تاستادى. وندا كوميسسيانىڭ قولى دا قويىلعان بولاتىن. ونىڭ قىسىمىمەن جەر تەلىمىنىڭ ماقساتتى باعىتى وزگەرگەنى تۋرالى جەر قاتىناستارى كوميسسياسىنىڭ شەشىمىنە قول قويۋعا ءماجبۇر بولدىم»، - دەدى ياكوۆ  زاياتس.

 سوتتالۋشى تاعىلعان ايىپتىڭ بارىمەن كەلىسەتىنىن ايتتى.

 «بۇل كورسەتكىشتەردى مويىندايمىن. مۇنىڭ ءبارى حراپۋنوۆتىڭ قىسىمىمەن بولعان. مەنىڭ سىرتىمنان قويىلعان قولعا كەلىسىم بەرۋگە ءماجبۇر بولدىم. ول مەنىڭ قۇجاتتارعا قول قويۋىمدى سۇراعان كەزدە حاتتامادا مەنەن باسقاسىنىڭ ءبارىنىڭ قولى بولدى. كەلىسىم كەزىندە جەر قاتىناستارى جانە قالا قۇرىلىسى كوميسسياسى وكىلدەرى، قالانىڭ باس ساۋلەتشىسى، جەر رەسۋرستارى جونىندەگى قالالىق كوميتەت دەپارتامەنتى، تابيعاتتى قورعاۋ مەكەمەلەرىنىڭ وكىلدەرى جانە زاڭگەرلەر بولدى»، - دەدى ايىپتالۋشى.

 زاڭبۇزۋشىلىق ەكەنىن بىلە تۇرا، قۇجاتقا نەگە قول قويعانىن سۇراعان پروكۋرورعا ول وقيعانىڭ قىسىم مەن قورقىتۋ ارقىلى جۇزەگە اسقانىن ايتتى.

 «ول مەنى قىسپاققا الىپ، قورقىتتى. ول كەزدە وتا جاساتقالى جۇرگەنمىن. مەن كەلىسىمىمدى بەردىم. جانە ول ءۇشىن ايىپتىمىن. «مەن سەنى ورنىڭنان الىپ تاستايمىن، كوزىڭدى قۇرتامىن» دەدى. بارىنەن بۇرىن قول قويساڭ دا، قويماساڭ دا، ەندىگى ماڭىزى قالماعان ەدى. كوپ قۇجاتتاردى مەنسىز دە راسىمدەپ جىبەرگەن. جەر تەلىمدەرى مەن جىلجىمايتىن مۇلىكتى ساتۋ، اۋدارۋ تەك سونىڭ قۇزىرىندا بولدى»، - دەدى ول.

 ياكوۆ زاياتس بۇدان بولەك «گورياچيە يستوچنيكي» ، ۇ و س ارداگەرلەرى ەمحاناسىن، سىرتقى ىستەر مينيسترلىگى قابىلداۋ ءۇيىن جانە گورنىي كوشەسى، 232 مەكەنجايىنداعى جەر تەلىمىنە قاتىستى قۇجاتتارعا قول قويعانى ءۇشىن ايىپتالعان.

 ەسكە سالا كەتسەك، ەرلى- زايىپتى حراپۋنوۆتار ۇيىمداسقان توپپەن بىرگە مەملەكەت مەنشىگىن ۇرلاۋ، لاۋازىمدىق وكىلەتتىكتى اسىرا پايدالانۋ، الاياقتىق، پارا الۋ، قىلمىستىق جولمەن الىنعان مۇلىكتى زاڭداستىرۋ باپتارى بويىنشا ايىپتالىپ وتىر.

اۆتور: ارايلىم جولداسباي