كەلەسى ايدان باستاپ اتتەستاتسيادان وتكەن مۇعالىمدەر ۇستەمە اقى الادى - ەرلان ساعاديەۆ

استانا. قازاقپارات - ق ر ءبىلىم جانە عىلىم ءمينيسترى ەرلان ساعادييەۆ قىركۇيەك ايىنان باستاپ اتتەستاتسيادان وتكەن مۇعالىمدەردىڭ ۇستەمە اقى الاتىنىن مالىمدەدى، دەپ حابارلايدى قازاقپارات ءتىلشىسى.

«بيىل پەداگوگتاردى اتتەستاتسيادان وتكىزۋدىڭ جاڭا جۇيەسى ەنگىزىلدى. اتتەستاتسيالاۋعا 60 مىڭعا جۋىق مۇعالىم قاتىستى. ولاردىڭ ىشىندە 36 مىڭنان استامى اتتەستاتسيادان ءوتتى. ول 63 پروتسەنتتى قۇرايدى. وسى جىلدىڭ قىركۇيەك ايىنان باستاپ اتتەستاتسيادان وتكەن مۇعالىمدەرگە العان كاتەگوريالارىنا قاراي ۇستەمە اقى تولەنەدى»، - دەدى ە. ساعاديەۆ ۇكىمەتتىڭ بۇگىنگى وتىرىسىندا.

ايتا كەتەيىك، اتتەستاتسيانىڭ ناتيجەسى بويىنشا 50 پروتسەنتكە دەيىنگى ۇستەمە اقى قاراستىرىلعان. بۇدان بولەك، بۇگىندە جاڭارتىلعان ءبىلىم مازمۇنى بويىنشا ساباق بەرەتىن مۇعالىمدەرگە 30 پروتسەنتتىك اقى تولەنىپ جاتىر. وتكەن جىلى 1, 2, 5 جانە 7-سىنىپتار جاڭا وقۋ باعدارلاماسىنا كوشسە، بيىلدان باستاپ 3, 6 جانە 8-سىنىپتار جاڭارتىلعان مازمۇن بويىنشا ءبىلىم الا باستايدى. دەمەك، وسى سىنىپتاردىڭ مۇعالىمدەرى دە 30 پروتسەنتتىك قوسىمشا اقى الاتىن بولادى.

ءمينيستردىڭ سوزىنە قاراعاندا، وسى جىلدىڭ اياعىنا دەيىن مەكتەپ وقۋشىلارىنىڭ 75 پروتسەنتى جاڭارتىلعان مازمۇن بويىنشا وقيدى.

 «ەكى جىلدا شامامەن 150 مىڭ ءمۇعالىم ارنايى كۋرستان ءوتتى. قازىرگى ۋاقىتتا 73 مىڭ پەداگوگ وقىپ جاتىر. جاڭارتىلعان مازمۇن بويىنشا ساباق بەرەتىن مۇعالىمدەردىڭ جالپى سانى - 205 مىڭ ادام. بۇگىندە ولاردىڭ 67 پروتسەنتىنىڭ جالاقى كولەمى 30 پروتسەنتكە كوبەيدى»، - دەپ اتاپ كورسەتتى ە. ساعاديەۆ.

ايتا كەتەيىك، الداعى ۋاقىتتا ۇلتتىق ءبىرىڭعاي تەستىلەۋ تارتىبىنە ءبىرقاتار وزگەرىستەر ەنگىزىلۋى مۇمكىن. اتالعان وزگەرىستەر ىسكە اسسا، مۇعالىمدەردىڭ بوس ۋاقىتى كوبەيەدى.