ا ق ش- تاعى ءىرى الاياقتىق: مينيسترلىك ءۇش قازاقستاندىقتىڭ اتى-ءجونىن جاريالادى

استانا. قازاقپارات - ق ر سىرتقى ىستەر مينيسترلىگى ا ق ش- تاعى ءىرى الاياقتىق ارەكەتتەرگە ءۇش قازاقستان ازاماتىنىڭ قاتىسقانىن راستادى، دەپ حابارلايدى قازاقپارات ءتىلشىسى.

«ءبىزدىڭ نيۋ-يورك قالاسىنداعى باس كونسۋلدىعىمىز امەريكا تاراپىمەن تىعىز قارىم-قاتىناستا، قاجەتتى كونسۋلدىق جانە قۇقىقتىق قورعاۋعا قاتىستى كومەك كورسەتىلىپ جاتىر. نيۋ-يورك شتاتىنىڭ وڭتۇستىك وكرۋگىنەن كەلىپ تۇسكەن مالىمەتكە سايكەس، قاماۋعا الىنعان ازاماتتاردىڭ اراسىندا ءبىزدىڭ ءۇش ازاماتىمىز بار. ولار - ازيزا دجاۆادازادە نەمەسە دجالولوۆا، 1994-جىلى تۋعان، ديورا ءاشىروۆا، 1991-جىلى تۋعان، جانە ەلەنا قۇدايبەرگەنوۆا، 1970-جىلى تۋعان. ءبىز ولاردىڭ قازاقستان ازاماتتارى ەكەنىن راستايمىز. ولاردى قاماۋعا الدى. ءبىز ءوز تاراپىمىزدان ءتيىستى كومەك بەرىپ جاتىرمىز»، - دەدى ق. ءابدىراحمانوۆ جۋرناليستەرگە بەرگەن سۇحباتىندا.

ايتا كەتەيىك، بۇعان دەيىن شەتەلدىك بۇقارالىق اقپارات قۇرالدارىندا نيۋ-يورك قالاسىندا قىلمىستىق توپتىڭ ۇستالعانى جايىندا جازىلدى. 25 ادام ءىرى الاياقتىقپەن اينالىستى. ولار عالامتوردا جالعان حابارلاندىرۋلاردى ورنالاستىرىپ، كولىكتەردى ساتقان. الايدا ۋاقىتشا فيرمالار ارقىلى الدىن الا تولەم العاننان كەيىن ىزدەرىن جاسىرىپ وتىرعان. وسىلايشا، الاياقتار 4,5 ميلليون دوللاردى قولدى قىلعان. نيۋ-يورك شتاتىنىڭ زاڭناماسى بويىنشا قىلمىسكەرلەر 20-30 جىلعا دەيىن باس بوستاندىعىنان ايىرىلۋى مۇمكىن.