بيىل قاي سىنىپتار جاڭارتىلعان مازمۇنداعى ءبىلىم بەرۋگە كوشەدى؟

استانا. قازاقپارات - ۇكىمەتتىڭ بۇگىنگى وتىرىسىندا ءبىلىم بەرۋ جۇيەسىن دامىتۋدى باعدارلاماسىنىڭ جارتى جىلدىق جۇمىسى قارالدى، دەپ حابارلايدى قازاقپارات ءتىلشىسى.

ق ر ءبىلىم جانە عىلىم ءمينيسترى ەرلان ساعاديەۆتىڭ ايتۋىنشا، جوسپار بويىنشا بيىل ءبىرقاتار سىنىپتار ءبىلىمنىڭ جاڭارتىلعان مازمۇنىنا كوشەتىن بولادى.

«وتكەن جىلدان باستاپ 1-، 2-، 5-جانە 7-سىنىپتار جاڭا وقۋ باعدارلاماسى بويىنشا ءبىلىم الۋدا. وسى 2018-وقۋ جىلىنان باستاپ قوسىمشا 3-، 6- جانە 8-سىنىپتار جاڭارتىلعان مازمۇن بويىنشا ءبىلىم الا باستايدى. ولارعا ارنالعان وقۋلىقتار دايىن. بارلىعى ساراپتامادان ءوتتى، باسىلدى. وقۋلىقتاردى وبلىستارعا جەتكىزۋ جۇمىسى باستالىپ كەتتى»، - دەدى ە. ساعاديەۆ.

ءمينيستردىڭ سوزىنە قاراعاندا، قازىرگى كەزدە مەكتەپكە دەيىنگى بالالاردى بىلىممەن قامتۋ دەڭگەيى 93 پروتسەنتتى قۇرايدى. وعان «بالاپان» باعدارلاماسى، سونىڭ ىشىندە جان باسىنا قاراي قارجىلاندىرۋ تەتىگى وڭ اسەرىن تيگىزدى. «ەلەكتروندى ۇكىمەت پەن «ە- اكىمدىكتىڭ ينتەگراتسياسى ارقىلى 25 قالا جانە 6 اۋداندا بالاباقشالارعا ەلەكتروندى تۇردە جولداما بەرۋ جۇيەسى ىسكە قوسىلدى. وسى جىلدىڭ اياعىنا دەيىن بارلىق وبلىستار اتالعان جۇيەگە قوسىلاتىن بولادى»، - دەپ اتار كورسەتتى ە. ساعاديەۆ.