حراپۋنوۆتار ءىسى: الماتىنىڭ ەكس-اكىمى قانداي مۇلىكتەردى زاڭسىز يەمدەنگەن؟

الماتى. قازاقپارات - الماتىدا ءوتىپ جاتقان سوت بارىسىندا قانداي مۇلىكتەر زاڭسىز جەكەشەلەندىرىلگەنى انىقتالدى، دەپ حابارلايدى قازاقپارات ءتىلشىسى.

ايىپتاۋ اكتىسىنە سايكەس، حراپۋنوۆ ءىسى بويىنشا - 20 ەپيزود، لەيلا حراپۋنوۆانىڭ ءىسى بويىنشا- 11 ەپيزود، لەيلا حراپۋنوۆانىڭ ءسىڭلىسىنىڭ كۇيەۋى - ايارا يلياسوۆتىڭ ءىسى بويىنشا 1 ەپيزود قارالىپ جاتىر.

تەك قانا 2002-2003-جىلدار اراسىندا الماتىدا 50 جەر ۋچاسكەسى زاڭسىز ساتىلعان. ونىڭ ىشىندە گورنايا 232 مەكەنجايىنداعى الاڭ، نازاربايەۆ كوشەسىندەگى 186№ بالاباقشا عيماراتى، «Shadid Engineering Ltd» جانە «ا ك ب «كازكوممەرتس بانك» ج ا س جەكەشەلەندىرىلگەن.

ماسەلەن، «سامال-3» شاعىن اۋدانىنداعى جەر تەلىمى تۇرعىن ءۇي سالۋعا «Shadid Engi-neering Ltd»  كومپانياسىنا بەرگەن. ەكى جىلدان سوڭ ۋچاسكە كومپانيادان مەملەكەت مۇددەسى ءۇشىن تارتىلىپ الىنعان. 2003-جىلى كۇزدە تاركىلەنگەن ۋچاسكە حراپۋنوۆتىڭ تۋىستارىنا بەرىلدى.

جەر ۋچاسكەلەرىنىڭ كەيبىرى لەيلا حراپۋنوۆانىڭ تۋىستارىنىڭ اتىنا اۋدارىلعان.

ودان بولەك، 2002-جىلى 15- قاراشادا حراپۋنوۆ نورماتيۆتىك قۇقىقتىق اكتىلەرگە سايكەس جەرىن الۋعا تىيىم سالىنعان «مەدەۋ» مەملەكەتتىك تابيعي پاركىنىڭ «دۋبوۆايا روشا» مەن «لەسنايا سكازكا» دەمالىس الاڭدارىن زاڭسىز بەرۋ تۋرالى قاۋلى شىعارعان. سول جىلدارى لەيلا حراپۋنوۆا عا قاتىسى بار «گۋلميرا» ج ش س «دۋبوۆايا روشا» دەمالىس الاڭىن 1 ميلليون 800 مىڭ تەڭگەگە، ال «لەسنايا سكازكا» الاڭىن 2 ميلليون 100 مىڭ تەڭگەگە ساتىپ العان.

سونىمەن قاتار، حراپۋنوۆ الماتى اۋەجايىنداعى تەرمينالداردى، ق ر س ءى م قابىلداۋ ءۇيى، ۇ و س ارداگەرى ەمحاناسىن، «سايران» تاعى باسقا مۇلىكتەردى يەمدەندى دەگەن ايىپ تاعىلدى.

الماتى ەكس- اكىمى «قۋات» قۇرىلىس كومپانياسىنان، «ا ي ت حاۋزينگ كومپلەكس» كومپانياسىنان پارا الدى دەپ ايىپتالدى.

ايتا كەتۋ كەرەك، الماتى قالاسى قىلمىستىق ىستەر جونىندەگى مامانداندىرىلعان اۋدانارالىق سوتىندا ەرلى-زايىپتى حراپۋنوۆتارعا قاتىستى ءىس قارالىپ جاتىر. ۆيكتور مەن لەيلا حراپۋنوۆتاردان وزگە سوتتالۋشىلار قۋاندىق بەكسۇلتانوۆ، التاي قاسىموۆ، ياكوۆ زاياتس، اباي ساپاروۆ، سەريك ەسمۇحانوۆ، ايار يلياسوۆ، ايناكۇل سادىقبايەۆا، ابدۋل-عازيز مۇقاشيەۆ، ابىلايحان قارىمساقوۆ، عابيدەن قايىمسۇلتانوۆتار سوت الدىندا جاۋاپ بەرمەك.

ۆيكتور مەن لەيلا حراپۋنوۆتار، ايار يلياسوۆقا سىرتتاي قاماۋعا الۋ تۇرىندە بۇلتارتپاۋ شاراسى قولدانىلدى. قالعان تۇلعالاردان ەشقايدا كەتپەۋ تۋرالى قولحات الۋ شاراسى تاڭدالدى.