شىمكەنت اكىمى جۇمىسسىز جۇرگەن ايەلدەرگە قولداۋ كورسەتپەك
بۇل تۋرالى قازاقپارات اكىمنىڭ باسپا ءسوز قىزمەتىنە سىلتەمە جاساپ حابارلايدى.
الەۋمەتتىك جاعدايى تومەن ايەلدەردى بەلگىلى ءبىر كاسىبي ماماندىقتار بويىنشا ءبىلىمىن جەتىلدىرۋىنە جانە ءوز ءىسىن اشۋ ءۇشىن جەڭىلدىكپەن نەسيە الۋىنا جاردەم كورسەتىلمەك.
«كوبىنە مەنىڭ قابىلداۋىما كەلگەن ايەلدەر كۇيەۋلەرىنىڭ جۇمىس ىستەمەيتىنىن، وتباسىن اسىراۋعا بەي- جاي قارايتىنىن نە بولماسا وتباسىن مۇلدەم تاستاپ كەتكەنىن اشىنا وتىرىپ ايتادى. ولار جارقىن ومىردەن ءۇمىتسىز دە ەمەس. دەگەنمەن، كۇندەلىكتى تاپقان تابىسى بالالارىن قاتارىنان كەم قىلماي باعىپ- تاربيەلەۋگە مۇمكىندىك بەرمەيدى. ولار وتباسىنىڭ باقىتتى عۇمىرى ءۇشىن ەڭبەك ەتۋگە ءازىر. سول سەبەپتەن دە، ءبىز ولارعا لايىقتى جاردەم كورسەتۋىمىز كەرەك. بۇل تۇرعىدا، ءبىزدىڭ مىندەتىمىز - ولاردىڭ ءوز ءىسىن جۇرگىزىپ، اياعىنا نىق تۇرىپ كەتۋىنە ىقپال ەتۋ» ، - دەدى عابيدوللا ءابدىراحىموۆ قالا اكىمدىگىنىڭ اپپاراتى ماجىلىسىندە.
سونداي- اق، اكىم جاۋاپتى سالا ماماندارىنا تاعدىر تەپەرىشىن تارتقان ايەلدەر ءۇشىن 1 اي ىشىندە شاعىن بيزنەستى دامىتۋ باعدارلاماسىن ازىرلەۋدى تاپسىردى.
باعدارلامانىڭ نەگىزگى باعىتىنا سايكەس، ءوز ءىسىن اشۋعا نيەتتى ايەلدەر ءوزى تاڭداعان ماماندىقتار بويىنشا، ياعني، شاشتاراز، مانيكيۋر، ماسساج، اسپاز نەمەسە تىگىنشىلىك سەكىلدى قىسقا كۋرستاردان ءوتۋى ءتيىس. وسى ارقىلى ولاردىڭ ءوز شاعىن بيزنەسى جانە تۇراقتى تابىسى بولماق.
شىمكەنت قالالىق جۇمىسپەن قامتۋ ورتالىعىنىڭ مالىمەتتەرى بويىنشا، قازىرگى ۋاقىتتا قالادا تۇراقتى جۇمىسى جوق 10 مىڭعا جۋىق ايەل تىركەلگەن.
