قوستانايدا ۇن زاۋىتى اشىلادى
تاجىكستان قازاقستان بيدايىن ساتىپ الۋدى %15 ارتتىردى الماتى وبلىسىندا ۇساق شارۋاشىلىقتار سەرۆيستىك- دايىنداۋ ارقىلى ىرىلەنىپ كەلەدى
وبلىس اكىمى ارحيمەد مۇحامبەتوۆتىڭ قاتىسۋىمەن وتكەن سەلەكتور كەڭەسىندە وڭىردەگى ينۆەستيتسيالىق جوبالاردىڭ جۇزەگە اسۋ بارىسى تالقىلاندى. بيىل قۇرىلىسى باستالاتىن نىساننىڭ ءبىرى - ۇن زاۋىتى. اتالعان جوبانى الماتىلىق « Bio Grain» كومپانياسى قولعا الماق. كوپ سالالى ءارى وندىرىستىك قۋاتى اسا جوعارى جاڭا كاسىپورىن ۇن، كەسپە، كراحمال، گليۋتەن، قوسپاجەم جانە مايلى داقىل ونىمدەرىن وڭدەپ شىعاراتىن بولادى.
« ۇن زاۋىتىن سالۋ ءۇشىن بارلىعى 90 ميلليارد تەڭگە قاجەت. زاۋىت ىسكە قوسىلسا، 500 جاڭا جۇمىس ورنى اشىلادى. ونىڭ 20 سى - قىتايلىق ينجەنەر- تەحنولوگ ماماندار. 480 ءى جەرگىلىكتى تۇرعىندار. بىلىكتىلىگىن ارتتىرۋ ماقساتىندا 100 ادام قىتايعا وقۋعا جىبەرىلەدى دەپ جوسپارلانعان. زاۋىتتى قاجەتتى شيكىزاتپەن جەرگىلىكتى شارۋاشىلىقتار قامتاماسىز ەتەدى. كاسىپورىن ديحانداردان جىلىنا 600 مىڭ توننا 3 كلاستى بيداي، 120 مىڭ توننا مايلى داقىل جانە 750 مىڭ توننا 4,5 كلاستى ءبيداي ساتىپ الۋدى جوسپارلاپ قويعان» ، - دەدى « Bio Grain» كومپانياسىنىڭ باسشىسى دينا وتەبايەۆا.
ۇن زاۋىتى قۇرىلىسقا رۇقسات بەرىلگەننەن كەيىن 2 جارىم جىل ىشىندە سالىنىپ بىتەدى. قۇرىلىس جۇمىستارىنا 1200 ادام تارتىلماق. ءقازىر وبلىس ورتالىعىنداعى يندۋستريالىق ايماقتان جوباعا لايىق جەر تەلىمىن رەسىمدەۋ ءجۇرىپ جاتىر.
جيىندا ارقالىق قالاسىنداعى ەت وڭدەۋ كەشەنىنىڭ قۇرىلىسى دا ءسوز بولدى. كاسىپورىن كەلەشەكتە جىلىنا 1000 تونناعا دەيىن ەت وڭدەپ، شۇجىق ونىمدەرى مەن ەت كونسەرۆىلەرىن شىعارادى. بۇگىندە كەشەننىڭ مال سويۋ، ەت وڭدەۋ سەحتارىنىڭ، قويما عيماراتتارىنىڭ ءىشى ارلەنىپ، قۇرىلعىلاردى قۇراستىرۋ، ورنالاستىرۋ جۇمىستارى ءجۇرىپ جاتىر. مال سوياتىن ورىنعا ەلەكتر جەلىلەرى مەن سۋ، جىلۋ قۇبىرى تارتىلعان. اتالعان قۇرىلىس جۇمىستارىنا 60 ادام تارتىلعان. كەشەننىڭ ەت وڭدەيتىن قۇرىلعىسى پولشادان ساتىلىپ الىندى. قۇنى 250 ميلليون تەڭگە بولاتىن قۇرىلعى ارقالىققا 15 - تامىز كۇنى جەتكىزىلەدى. ۇدەمەلى يندۋستريالى- يننوۆاتسيالىق باعدارلاما اياسىندا قولعا الىنعان اۋقىمدى جوبا بيىل قازان ايىندا ىسكە قوسىلماق.
اتالعان ينۆەستيتسيالىق جوبا، باسقاسىن ايتپاعاندا، تۇرمىسى ءتورت تۇلىك مالعا قاراپ وتىرعان تورعاي ءوڭىرى تۇرعىندارىنىڭ الەۋمەتتىك جاعدايىن جاقسارتادى دەگەن ءۇمىت مول. ارقالىق ەت وڭدەۋ زاۋىتى بۇعان دەيىن باققانىن باقىرعا ايىرباستاپ كەلگەن بايتاق جۇرتتىڭ تىرشىلىگىن بەرەكەلى ەتپەك.
ايتا كەتەيىك، بيىلدىڭ وزىندە وبلىستا جالپى قۇنى 37 ملرد تەڭگە بولاتىن 18 جوبا جۇزەگە اسىپ، 1000 ادام تۇراقتى جۇمىس ورنىمەن قامتىلعان. الداعى جىلى جاڭادان 10 ينۆەستيتسيالىق جوبا ىسكە قوسىلماق.
اۆتور: قاسقىرباي قويشىمانوۆ
