بىرىككەن ۇلتتار ۇيىمى بىتىمگەرشىلىك ميسسيالارىنا اسكەريلەر قالاي ىرىكتەلەدى

استانا. قازاقپارات - ق ر قورعانىس مينيسترلىگى ب ۇ ۇ بىتىمگەرشىلىك وپەراتسيالارىنا قاتىساتىن اسكەري قىزمەتشىلەرگە قانداي تالاپتار قويىلاتىنىن باياندادى، دەپ حابارلايدى قازاقپارات ءتىلشىسى.

«ب ۇ ۇ بىتىمگەرشىلىك وپەراتسيالارىنا شەتەل ءتىلىن مەڭگەرگەن، دەنساۋلىعى جاقسى، پسيحولوگيالىق جاعىنان تۇراقتى، اۆتوكولىك باسقارا الاتىن، دەنە دايارلىعى مىقتى اسكەري قىزمەتشىلەر قاتىسا الادى. «قازاقستان رەسپۋبليكاسىنىڭ بىتىمگەرشىلىك قىزمەتى تۋرالى» زاڭىنا سايكەس، بىتىمگەرشىلىك ميسسيالارعا قاتىسۋ ءۇشىن ۇمىتكەرلەردى ىرىكتەۋ كەلىسىمشارت بويىنشا اسكەري قىزمەت وتكەرىپ جاتقان جانە بىتىمگەرشىلىك دايىندىقتان وتكەن قر قارۋلى كۇشتەرىنىڭ اسكەري قىزمەتشىلەرى قاتارىنان ەرىكتى نەگىزدە جۇزەگە اسىرىلادى»، - دەپ جاۋاپ بەردى مينيسترلىكتىڭ باسپا ءسوز قىزمەتى قازاقپارات ساۋالىنا.

 باسپاءسوز قىزمەتىنىڭ حابارلاۋىنشا، بىتىمگەرشىلىك وپەراتسيالارعا قاتىسقان جاعدايدا اسكەري قىزمەتشىلەرگە ق ر قورعانىس مينيسترلىگىنەن جانە ب ۇ ۇ- دان اقشالاي ۇلەس تولەنەدى جانە «جاۋىنگەرلىك ءىس- قيمىلدارعا قاتىسۋشى» مارتەبەسى بەرىلەدى.

ايتا كەتەيىك، 2018 -جىلدىڭ 15 - ماۋسىمىنداعى ق ر پارلامەنتىنىڭ شەشىمىنە سايكەس، ق ر قارۋلى كۇشتەرىنىڭ بىتىمگەرشىلىك روتاسى، اسكەري بايقاۋشىلارى مەن شتاب وفيتسەرلەرى ب ۇ ۇ ليۆانداعى ميسسياسىنا جىبەرىلەدى.

 «بىتىمگەرشىلىك روتا ليۆانداعى ب ۇ ۇ ميسسياسىنا بيىلعى جىلدىڭ قاراشاسىندا 6 اي سايىن اۋىسۋ جولىمەن جىبەرىلەدى. اسكەري بايقاۋشىلار مەن شتاب وفيتسەرلەرى اتالعان 5 ميسسياعا 2018-2019 -جىل ارالىعىنا - ءبىر جىلدىق مەرزىمگە جىبەرىلەدى»، - دەلىنگەن رەسمي جاۋاپتا.

 بۇعان دەيىن ق ر پارلامەنتىنىڭ 2013 -جىلعى جەلتوقسانداعى قاۋلىسىنا سايكەس، 2014 - جىلدان باستاپ، ق ر قارۋلى كۇشتەرىنىڭ 15 وفيتسەرى ۇ ۇ باتىس ساحارا مەن كوت- ديۆۋارداعى ميسسيالارعا اسكەري بايقاۋشىلار رەتىندە قاتىسقان ەدى.

اۆتور: ايجان سەرىكجان قىزى