تارباعاتايدان تاعى ءبىر «التىن ادامنىڭ» تابىلعانى راستالدى

وسكەمەن. قازاقپارات - ءدال قازىر وسكەمەندە تارباعاتاي اۋدانىنىڭ ەلەكە سازى جايلاۋىندا جۇرگىزىلگەن ارحەولوگيالىق زەرتتەۋلەردىڭ العاشقى ناتيجەلەرى ب ا ق وكىلدەرىنە تانىستىرىلۋدا، دەپ حابارلايدى قازاقپارات ءتىلشىسى.

بۇل - شىعىس قازاقستان جەرىنەن تابىلعان بەسىنشى «التىن ادام». قازبا جۇمىستارىنا جەتەكشىلىك ەتكەن اكادەميك زەينوللا ساماشيەۆ تابىلعان «التىن ادامنىڭ» ەش بۇلىنبەگەنىن ايتادى. بارلىق التىن بۇيىمدار مەن كيىم-كەشەگى سول كۇيىندە ساقتالعان.

«بۇل - ءبىزدىڭ زامانىمىزعا دەيىنگى VIII عاسىرعا جاتاتىن ەرتە ساق ءداۋىرىنىڭ مۇراسى. ەسىك قورعانىنان تابىلعان «التىن ادامنان» دا كونە. ەكەۋىنىڭ اراسىندا 3 عاسىر ايىرماشىلىق بار. وسىلايشا اراعا 50 جىل سالىپ قازاق دالاسىنان ەكىنشى رەت تونالماعان «التىن ادام» تابىلدى» - دەيدى ارحەولوگ.

ەلەكە سازىندا جەرلەنگەن ادامنىڭ جاسى 16-17 جاس مولشەرىندە دەگەن بولجام بار. ونىڭ قاسىنا ەرەسەك ادام قويىلعان ەكەن. ارحەولوگتىڭ ايتۋىنشا ول قاتتى توناۋعا تۇسكەن.

«ال بوزبالانىڭ مۇردەسىن توناۋشىلار بايقاماسا كەرەك» - دەيدى عالىم.

ەسكە سالا كەتەيىك، ءبىز وسىعان دەيىن شىعىس قازاقستاندا التىن ادامنىڭ تابىلعانى تۋرالى جازعان بولاتىنبىز.