شىعىس قازاقستاندا ءبىر عاسىردان استام تاريحى بار مەشىت قۇلاۋدىڭ الدىندا تۇر
كەزىندە مەشىت بولعان نىسان، ءبىراز جىلدان بەرى اپاتتى جاعدايدا تۇر. ىرگەتاسى جەرمەن جەكسەن بولىپ، اعاش بەلدىكتەرى ابدەن ءشىرىپ كەتكەن.
اقكول اۋىلىندا قازىر بىرنەشە ءۇي عانا قالعان. سولاردىڭ بىرىندە زەينەتكەر گۇلشيرا اجەي تۇرادى. ءبىراق ول كىسى كوشپەيتىنىن ايتادى. سەبەبى مەشىت عيماراتىن قاراۋسىز قالدىرىپ كەتكىسى كەلمەيدى.
«توبەسىنىڭ قاڭىلتىرى ۇشىپ كەتتى. مۇنارالارى ءالى قۇلامايدى»، - دەيدى گۇلشيرا ساپارييەۆا.
بۇل مەشىتتى وسىدان 111 جىل بۇرىن جەرگىلىكتى سۇلتان فازىلبەكوۆ ەسىمدى ازامات سالعان ەكەن. عيماراتتىڭ قۇرىلىس جۇمىستارىنا باشقۇرتستاننىڭ ەڭ مىقتى دەگەن ساۋلەتشىلەرىن جۇمىلدىرىپتى. ال قۇرىلىس ماتەريالدارى بۇكىل ەرتىس جاعاسىنداعى ەلدى مەكەندەردەن جەتكىزىلگەن كورىنەدى. عيمارات مەشىت رەتىندە 10 جىل عانا پايدالانىلعان. كەيىننەن كەڭەس ۇكىمەتىنىڭ تۇسىندا مۇندا باستاۋىش مەكتەپ بولعان. اۋىل تۇرعىنى ماليكا ناۋرىزبايەۆانىڭ ايتۋىنشا، بۇل عيماراتتى قايتادان قالىپقا كەلتىرسە، اۋىل دا اجارلانا تۇسەدى.
«بۇل جەردەن تاسجول ءوتىپ جاتىر. ءتىپتى كەيبىر جولاۋشىلار وسىندا توقتاپ، عيماراتقا تامسانىپ قاراپ كەتەدى. ياعني حالىق قىزىعادى دەگەن ءسوز. دەمەك بۇل جەردە ءتۋريزمدى دە دامىتۋعا بولادى»، - دەيدى اۋىلدىق وكرۋگتىڭ قوعامدىق مەدياتورى ماليكا ناۋرىزبايەۆا.
بيىل جازدا بۇل عيماراتقا وبلىستىق تاريحي- مادەني مۇرانى قورعاۋ ورتالىعىنىڭ ماماندارى دا قىزىعۋشىلىق تانىتىپتى. نىساندى جان- جاقتى زەرتتەگەن ولار، مۇندا «رۋحاني جاڭعىرۋ» باعدارلاماسىنىڭ اياسىندا جوندەۋ جۇمىستارىن جۇرگىزەتىن بولىپ شەشكەن.
«اقكول مەشىتى بۇگىنگى كۇنى قاتاڭ باقىلاۋدا تۇر. وسى ماۋسىم ايىندا وبلىستىق مادەنيەت باسقارماسىنان جۇمىس توبى كەلىپ، زەرتتەپ كەتكەن بولاتىن. مەشىت جوندەۋدەن وتكىزىلەدى. ءبىراق قاشان، قاي ۋاقىتتاردا بولاتىنى بەلگىسىز. ونى سول جۇمىس توبى شەشەتىن بولادى»، - دەيدى بەسقاراعاي اۋدانى اكىمىنىڭ ورىنباسارى باۋىرجان باتالوۆ.
مەشىتتى قالپىندا ساقتاپ قالۋدى ماماندار بۇرىن دا قولعا العان ەكەن. الايدا ونى وبلىس ورتالىعىنا اپارىپ قويماق بولعان. ءبىراق بۇعان جەرگىلىكتى تۇرعىندار قارسى بولىپتى. ەندى الداعى ۋاقىتتا اتالعان عيمارات اقكول اۋىلىنىڭ سانىنە اينالادى دەگەن سەنىم مول.
