الماتىدا دۇنيەجۇزىنىڭ فۋتزال كوماندالارى اراسىندا الەم چەمپيناتى وتەدى

الماتى. قازاقپارات - الماتىدا ستۋدەنتتەر اراسىندا فۋتزالدان الەم چەمپيوناتىنا سوڭعى دايىندىق جۇمىستارى وتۋدە.

بۇل تۋرالى ۇلتتىق ستۋدەنتتىك ليگانىڭ باسشىسى، حالىقارالىق اقپاراتتىق تەحنولوگيالار ۋنيۆەرسيتەتىنىڭ رەكتورى دامير شىنىبەكوۆ ايتىپ بەردى، دەپ حابارلايدى قازاقپارات قالا اكىمدىگى باسپا ءسوز قىزمەتىنە سىلتەمە جاساپ.

«ءبىزدىڭ ەلىمىز ءىرى سپورتتىق ءىس-شارالاردى وتكىزۋدە زور تاجىريبەگە يە. تەك سوڭعى جىلداردىڭ وزىندە قازاقستاندا، اتاپ ايتقاندا، الماتىدا الەمدىك دەڭگەيدەگى كوپتەگەن سپورت جارىستارى وتكىزىلدى. فۋتزال سياقتى ديناميكالىق جانە اسەرلى سپورت تۇرىنەن الەم چەمپيوناتى ءوتۋى - ءبىزدىڭ قالامىزدىڭ تۇرعىندارى مەن قوناقتارى ءۇشىن ۇلكەن مەرەكە بولماق. وسى مۇمكىندىكتى پايدالانا وتىرىپ، مەن بارلىق سپورت سۇيەر قاۋىمدى الەمدى مويىنداتقان سپورت شەبەرلەرىنىڭ جارىسىن تاماشالاپ، جانكۇيەر بولۋعا شاقىرامىن. الماتىلىق «قايرات» فۋتزال كلۋبىنىڭ الەمدىك ارەناداعى جەتىستىكتەرىنىڭ ارقاسىندا قازاقستان وسى سپورت ءتۇرىن دامىتىپ جاتقان ەلدەردىڭ ءبىرى. الماتىدا وتەتىن ستۋدەنتتەر اراسىنداعى الەم چەمپيوناتى وسىعان دالەل»، - دەدى دامير شىنىبەكوۆ.

سونداي-اق، ۇلتتىق ستۋدەنتتىك ليگانىڭ پرەزيدەنتى قازاقستان الەم چەمپيوناتىن وتكىزۋ قۇقىعىن قالاي يەلەنگەنىن ايتتى.

«بۇل 2015-جىلدىڭ قازان ايىندا بولعان. الەمنىڭ بىرنەشە ءىرى قالالارى وسىنداي اۋقىمدى تۋرنيردى وتكىزۋ قۇقىعىنا تالاستى، ناتيجەسىندە FISU شەشىمىمەن تاڭداۋ الماتىعا ءتۇستى. بۇل اۋقىمدى وقيعا ت م د اۋماعىندا العاش رەت وتكىزىلەتىنىن اتاپ ءوتۋ كەرەك»، - دەدى دامير ءابدۋحالي ۇلى.

تامىزدىڭ 19 ى مەن 26 ى ارالىعىندا وتەتىن ستۋدەنتتەر اراسىنداعى فۋتزالدان الەم چەمپيوناتىنا ءبىر ايداي ۋاقىت قالدى. تەڭبىل دوپ دوداسىنا الەمنىڭ ءار تاراپىنان جينالعان 16 ەر جانە 9 ايەلدەر قۇراماسى سىنعا تۇسەدى.

جارىستار بارلىق زاماناۋي تالاپتارعا جاۋاپ بەرەتىن ەكى ءىرى سپورت كەشەنىندە - Almaty Arena جانە Halyk Arena وتەدى.