ارىستانبەك مۇحامەدي ۇلى باستاعان تانىمال تۇلعالار سالت اتپەن جەتىسۋدى ارالادى

تالدىقورعان. قازاقپارات - الماتى وبلىسىنىڭ الاكول اۋدانىندا ەلىمىزدە تۇڭعىش رەت ۇزاق قاشىقتىققا سالت اتتىلار سەرۋەنى ۇيىمداستىرىلدى.

شاراعا ق ر مادەنيەت جانە سپورت ءمينيسترى ارىستانبەك مۇحامەدي ۇلى، «قاز مۇناي گاز» ا ق باسقارما كەڭەسىنىڭ ءتوراعاسى ساۋات مىڭبايەۆ، ءوڭىر باسشىلارى مەن ەلگە تانىمال سپورتشىلار قاتىستى، دەپ حابارلايدى قازاقپارات ءتىلشىسى.

الاكول اۋدانىنداعى لەپسى اۋىلىنان باستالعان سالت اتتىلار كەرۋەنىن ەلگە تانىمال مەتسەنات، «جەرسۋ» كورپوراتسياسىنىڭ باسقارما كەڭەسىنىڭ ءتوراعاسى باۋىرجان وسپانوۆ ۇيىمداستىردى. شاراعا قاتىسۋشىلار جوڭعار الاتاۋىنىڭ باۋرايىمەن 50 شاقىرىمعا جۋىق قاشىقتىقتى ءجۇرىپ ءوتىپ، جامانتاس جايلاۋىنا كوتەرىلدى. كاسىپقوي بوكسشى قانات يسلام، م م ا ارالاس جەكپە- جەگىنىڭ سپورتشىسى ارمان وسپانوۆ، 2004-جىلعى وليمپيادا چەمپيونى باقتيار ارتايەۆ، وليمپيادانىڭ كۇمىس جۇلدەگەرى نۇرباقىت تەڭىزبايەۆ سىندى ەل ماقتانىشى بولعان سپورتشىلار بىردە شاۋىپ، بىردە جەلىپ وتىرىپ، بىرنەشە اسۋلاردان ءوتتى. جول-جونەكەي جەتىسۋدىڭ كەرەمەت تابيعاتىنا تامسانىپ وتىردى.

سپورتشىلار اراسىندا ومىرىندە العاش رەت اتقا مىنگەن ازاماتتار دا بولدى. سونىڭ ءبىرى - ۆەل باركەر كۋبوگىنىڭ يەگەرى باقتيار ارتايەۆ. ول ءوزىنىڭ وسى ۋاقىتقا دەيىن تۇلپاردىڭ تىزگىنىن ۇستاۋعا مۇمكىندىگى بولماعانىن ايتىپ، ءبىرىنشى رەت اتقا وتىرسا دا بىردەن ۇيرەنىپ، شاۋىپ كەتكەنىن قۋانا جەتكىزدى. «دەمەك اتقا ءمىنۋ قابىلەتى قانىمىزدا بار» دەپ مويىندادى ول.

ەلباسىنىڭ «رۋحاني جاڭعىرۋ: بولاشاققا باعدار» ماقالاسى اياسىندا ۇيىمداستىرىلعان سالت اتتىلار سەرۋەنىنىڭ باستى ماقساتى - بۇقارانى جەتى قازىنامىزدىڭ ءبىرى اتقا مىنۋگە ۇندەپ، سالاۋاتتى ءومىر سالتىن قالىپتاستىرۋ جانە وتاندىق تۋريزمدى دامىتۋ. تابيعاتىمىزدى ايالاپ، تۋعان جەرىمىزدىڭ كورىكتى جەرلەرىن تانىمال تۇلعالار ارقىلى ناسيحاتتاۋ.

جامانتاس جايلاۋى تەڭىز دەڭگەيىنەن 2500 مەتر بيىكتىكتە ورنالاسقان. «قازىر بۇل جەردە 10 مىڭعا جۋىق جىلقى جايىلىپ ءجۇر» دەيدى كاسىپكەر باۋىرجان وسپانوۆ.