دانيار ەلەۋسىنوۆتىڭ جەڭىسى تۋرالى قانداي پىكىرلەر ايتىلىپ جاتىر

استانا. قازاقپارات - قازاقستاندىق بوكسشى دانيار ەلەۋسىنوۆ كارديففتە كاسىپقوي رينگتەگى ءۇشىنشى جەڭىسىنە قول جەتكىزدى.

جەڭىستىڭ سەنىمدىلىگىنە قاراماستان، ەلەۋسىنوۆتىڭ ءوز-وزىنە كوڭىلى تولماعان. بوكسشى Instagram پاراقشاسىندا ءار جەكپە-جەك سايىن جوعارى ناتيجە كورسەتىپ وتىرۋعا ءسوز بەردى، دەپ حابارلايدى قازاقپارات ءتىلشىسى.

ەلەۋسىنوۆ كاسىپقوي رينگتە ءۇشىنشى رەت جانە قايتىپ ورالعالى بەرى العاش رەت بوكستاستى. 27 جاستاعى قازاقستاندىق 30 جاستاعى ۆەنگريالىق گابور گوربيچتى ۇپاي بويىنشا ارتقا تاستاپ، جەڭىمپاز اتاندى.

ەسكە سالايىق، دانيار ەلەۋسىنوۆتىڭ كەزەكتى قارسىلاسىنىڭ ەسىمى بەلگىلى بولعاننان كەيىن گوربيچتىڭ بۇرىنعى قارسىلاستارى ۆەنگريالىق بوكسشىنىڭ سپورتتاعى دەڭگەيىنە قاتىستى پىكىر بىلدىرگەن ەدى. وسىلايشا، رەسەيلىك سەرگەي لۋبكوۆيچ ۆەنگريالىق سپورتشىنى «مىقتى قاپ» دەپ اتاسا، وزبەك شاحرام گياسوۆ گوربيچتى نوكاۋتقا جىبەرۋ وڭايعا سوقپايتىنىن ايتتى. بايقاعانىمىزداي، گياسوۆتىڭ ءسوزى راستالدى.

دانيار ەلەۋسىنوۆتىڭ ەكى ايدان كەيىن بۇدان دا جوعارى ناتيجە كورسەتۋگە مۇمكىندىگى بار. بوكسشىنىڭ پروموۋتەرى ەددي حيرن بريتاندىق ب ا ق- قا سۇحبات بەرۋ كەزىندە ەلەۋسىنوۆتىڭ كەلەسى جەكپە-جەگى قازان ايىندا ا ق ش- تا وتەتىنىن جەتكىزدى، دەپ حابارلايدى «SPORTINFORM» س ا ا.

«دانيار قارسىلاسىن نوكاۋتقا تۇسىرە الماعانى ءۇشىن قاتتى وكىنەدى. دەگەنمەن، جەكپە-جەكتىڭ ەكىنشى بولىمىندە ەلەۋسىنوۆ جاقسى ويىن كورسەتتى دەپ ويلايمىن. ءبىز وعان كاسىپقوي بوكسقا بەيىمدەلۋگە ۋاقىت بەرۋىمىز كەرەك»، - دەدى حيرن.

قازاقستاندىق جانكۇيەرلەر بوكسشىنىڭ Instagram پاراقشاسىندا قۇتتىقتاۋلار جازىپ، جەلىنى ءبىر دۇرلىكتىردى. كەيبىر بوكسسۇيەر قاۋىم نوكاۋتتىڭ بولماعانىنا تاڭدانىس ءبىلدىرىپ جاتسا، وزگە جانكۇيەرلەر «دانياردىڭ نوكاۋتەر ەمەس، سۋپەرتەحنيكالىق بوكسشى ەكەنىنە كونۋ كەرەك» دەپ جاۋاپ بەرۋدە.