قازاقستاندىق ءانشى سايا ماحامبەت حالىقارالىق بايقاۋدا باس جۇلدەنى يەلەندى

استانا. قازاقپارات - «پيروگوۆسكي راسسۆەت» حالىقارالىق ەسترادالىق ورىنداۋشىلار كونكۋرسىندا قازاق قىزى سايا ماحامبەت گران پري ۇتىپ الدى، دەپ حابارلايدى قازاقپارات ءتىلشىسى.

«پيروگوۆسكي راسسۆەت» حالىقارالىق ەسترادالىق ورىنداۋشىلار كونكۋرسى ماسكەۋ ىرگەسىندەگى مىتيشە قالاسىندا 2011-جىلدان باستاپ وتكىزىلىپ كەلەدى. قازاقستان اتالعان كونكۋرسقا وسىمەن ءۇشىنشى رەت قاتىستى.

رەسەيدە وسىمەن 8-رەت ۇيىمداستىرىلعان «پيروگوۆسكي راسسۆەت» بايقاۋىنا 11 ەلدەن (قازاقستان، وزبەكستان، رەسەي، ۋكراينا، بەلارۋس، بولگاريا، فرانسيا، كۋبا، ارمەنيا، پولشا، چەحيا) وكىلدەر قاتىستى.

«كونكۋرس ەرەجەسى بويىنشا قاتىسۋشىلار الدىمەن ىرىكتەۋ كەزەڭىنەن ءوتتى. سايا بايقاۋدا ەكى ءان ورىندادى جانە ەكەۋىن دە وتە جوعارى دەڭگەيدە الىپ شىقتى. ارينە، باسىندا ازداپ قوبالجۋ بولدى، دەگەنمەن ءادىلقازىلارعا ۇنادى»، - دەيدى ءانشىنىڭ مەنەدجەرى گۇلنۇر ءابيدىلدا قىزى.

بايقاۋ ەرەجەسى بويىنشا قاتىسۋشى ەكى ءان ورىنداۋى ءتيىس. ءبىرى - انا تىلىندە، ەكىنشىسى - ورىس تىلىندە. سايا ماحامبەت الدىمەن ءوزىنىڭ اۆتورلىق «قازاعىم» ءانىن ايتتى، سوسىن ۆ. تسويدىڭ «كۋكۋشكا» ءانىن ورىنداپ شىقتى. كونكۋرستا قويىلاتىن ەڭ جوعارى بال - 70 بولسا، سايا ماحامبەت 68 بال جيناپ، باس جۇلدەنى يەلەندى.

ايتا كەتەيىك، سايا ماحامبەت - «قازاق كونسەرت» ۇيىمىنىڭ ءانشىسى، «اراي»، «جاس قانات» رەسپۋبليكالىق جانە باسقا دا حالىقارالىق بايقاۋلاردىڭ لاۋرەاتى.