ازيادا: دزيۋدودان ەلدوس سمەتوۆ، وتگونتسەتسەگ گالبادراح باق سىنايدى

استانا. قازاقپارات - دزيۋدودان ازيا ويىندارىنا قاتىساتىن قازاقستان ۇلتتىق قۇراماسى جاساقتالدى، دەپ حابارلايدى قازاقپارات قازاقستاننىڭ دزيۋدو فەدەراتسياسىنا سىلتەمە جاساپ.

18- تامىز بەن 2- قىركۇيەك كۇندەرى يندونەزيادا ازيا ويىندارى وتەدى. XVIII جازعى ازيا ويىندارىندا 42 سپورت تۇرىنەن 476 مەدال ساراپقا سالىنادى. ال دزيۋدو بويىنشا سايىستار 29- تامىز بەن 1- قىركۇيەك كۇندەرىنە بەلگىلەنگەن.

دزيۋدودان قازاقستان ۇلتتىق قۇراما كومانداسى جىلدىڭ باستى دوداسىنا قاتىسۋ ءۇشىن 25- تامىزدا يندونەزياعا اتتانادى. «قازىرگى تاڭدا اقمولا وبلىسى، شۋچينسك قالاسىندا ورنالاسقان «جاقسى» سپورت بازاسىندا ازيا ويىندارى الدىنداعى وقۋ-جاتتىعۋ جيىنىنىڭ ەكىنشى كەزەڭىن وتكىزىپ جاتىر. جاتتىعۋ جيىنىندا ازيا ويىندارىنا قاتىساتىن بارلىق دزيۋدوشىلار بار. ءبىز ولاردى 2018-جىلدىڭ باسىنان باستاپ وتكەن گران پري، Grand Slam سىندى ءىرى جارىستارداعى كورسەتكىشتەرىنە قاراي ىرىكتەپ الدىق. ۇلتتىق قۇراماداعى سپورتشىلاردىڭ تىڭعىلىقتى دايىندىقتارىنا قاراپ، ازيا ويىندارىندا 1 التىن، 1 كۇمىس، 1 قولا جۇلدەنى جوسپارلاپ وتىرمىز»، - دەيدى دزيۋدودان قازاقستان ەرلەر ۇلتتىق قۇراما كومانداسىنىڭ باس باپكەرى ايدىن سماعۇلوۆ.

ازيادادا باق سىنايتىندار قاتارىندا قازاقستان ۇلتتىق قۇراما كومانداسىنا ەرلەردەن ەلدوس سمەتوۆ (-60 كەلى)، ەلدوس جۇماقانوۆ (-66 كەلى)، جانساي سماعۇلوۆ (-73 كەلى)، ديدار حامزا (-81 كەلى)، يسلام بوزبايەۆ (-90 كەلى)، ۆيكتور دەميانەنكو (-100 كەلى)، سانجار جاببوروۆ (+100 كەلى)، ەراسىل قاجىبايەۆ (mix)، ايەلدەردەن وتگونتسەتسەگ گالبادراح (-48 كەلى)، كامشات قاراساي قىزى(-52 كەلى)، سيەۆارا نيشانبايەۆا (-57 كەلى)، يولانتا بەرديبەكوۆا (-63 كەلى)، زەرە بەكتاس قىزى (-70 كەلى)، زارينا رايفوۆا (-78 كەلى)، گۇلجان يسانوۆا (+78 كەلى) الىندى.