قازاقستاندا العاش رەت گيك فەستيۆالى وتۋدە
اتالعان مادەني فەستيۆال نەگىزىنەن ا ق ش (ComicCon)، رەسەي (ComicCon Russia, يگرومير) جانە باسقا دا شەت ەلدەردە جىل سايىن وتكىزىلەدى جانە حالىق اراسىندا كەڭىنەن تانىلعان.
قازاقستاندا تۇڭعىش رەت ۇيىمداستىرىلۋدا. گيك مادەنيەتىنە ارنالعان شاراعا Marvel Comics, DC comics, گارري پوتتەر، جۇلدىزدى سوعىستار، (زۆەزدنىە ۆوينى)، Dota-2 سەكىلدى الەمگە تانىمال فرانشيزالاردىڭ 2 مىڭنان اسا جانكۇيەرلەرى جينالدى.
«بىزدە ەندى قولعا الىنعانىمەن شەتەلدەردە بۇنداي شارا تۇراقتى وتەدى جانە اۋديتورياسى كەڭ. مىسالى، ا ق ش- تا گيك فەستيۆال اپتالاپ وتەدى جانە گولليۆۋد فيلمدەرىندەگى كەيىپكەرلەردى سومداعان تانىمال اكتەرلەر شاقىرىلادى. شارانىڭ باستى يدەياسى مەن ماقساتى الەمدە تۇتاس ءبىر جانر بولىپ تابىلاتىن كينويندۋستريا، كوميكس، كيبەرسپورت، انيماتسيا مادەنيەتىن قازاقستاندادا دامىتۋ. سەبەبى بۇل ونەر جانە ءبىزدىڭ جاستاردىڭ قىزىعۋشىلىعى وتە جوعارى. ءبىز بولاشاقتا ءوزىمىزدىڭ وتاندىق گيك مادەنيەتى وكىلدەرىن قالىپتاستىرعىمىز كەلەدى»، - دەدى «Geek Con Astana 2018» فەستيۆالىنىڭ ۇيىمداستىرۋشىسى ءادىلحان ساپارعاليەۆ.
«Geek Con Astana 2018» فەستيۆالىندە كورەرمەندەر ەكى كۇن بويى ويىن-ساۋىق باعدارلامالارى، كوميكس، انيماتسيا قۇراستىرۋشىلاردىڭ شەبەرلىك ساباقتارى، 100 دەن اسا كوسپلەي قاتىسۋشىلار، كۆەست ويىندارى، مۋزىكالىق توپتار مەن سيقىرشىلاردىڭ باعدارلامالارى، VR، Playstation, xBox, Dendi, Sega ويىن-ساۋىقتارىنا قاتىسىپ، كورە الادى.
سونىمەن قاتار شاراعا گيك مادەنيەتى تاقىرىبىنا جازاتىن وتاندىق كىتاپ جانە انيماتسيا اۆتورلارى، كومپيۋتەر جانە ۇستەل ويىنىن قۇراستىرۋشىلار قاتىسۋدا.
ايتا كەتەيىك، گيك مادەنيەتى دەگەنىمىز - زاماناۋي زياتكەرلىك ساۋىق قۇرۋمەن قىزىعاتىن ادامداردى بىرىكتىرەتىن سۋبمادەنيەت. گيك مادەنيەتىمەن اينالىساتىندار نەمەسە قولدايتىندار قاتارىنا كومپيۋتەر جانە ۇستەل ويىندارىمەن اۋەستەنەتىندەر، ودان باسقا فانتاستيكا مەن فەنتەزي جانرلارى كەيىپكەرلەرىن ويلاپ تابۋشى، قۇراستىرۋشى ماماندار جاتادى.
