ەلباسى بەسىنشى كاسپي سامميتىنە دايىندىق ماسەلەلەرى جونىندە كەڭەس وتكىزدى
باس قوسۋدا كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا جانە وزگە دە كەلىسىمدەرگە قول قويۋعا ازىرلىك بارىسى تالقىلاندى، سونداي-اق مەملەكەت باسشىسىنىڭ قاتىسۋىمەن وتەتىن الداعى حالىقارالىق ءىس-شارالار كەستەسى قاراستىرىلدى.
- ءبىز كاسپي سامميتىنە كوپ جىلدار بويى دايىندالدىق. ساراپشىلارىمىز شەتەلدىك ارىپتەستەرىمەن بىرلەسىپ، اۋقىمدى جۇمىس اتقاردى. سونىمەن قاتار، تۇرىكمەنستاندا حالىقارالىق ارالدى قۇتقارۋ قورىن قۇرۋشى مەملەكەتتەر باسشىلارىنىڭ كەزدەسۋى وتەدى. ءبىز سوعان قاتىسۋىمىز كەرەك، - دەدى قازاقستان پرەزيدەنتى.
كەڭەستە سىرتقى ىستەر ءمينيسترى ق. ءابدىراحمانوۆتىڭ بەسىنشى كاسپي سامميتىنە دايىندىق بارىسى جونىندەگى ەسەبى تىڭدالدى. - بەسىنشى كاسپي سامميتىنىڭ اياسىندا كاسپي تەڭىزىنىڭ قۇقىقتىق رەجىمىن انىقتاۋ ءۇشىن كوپ جىلعى كەلىسسوزدەردى اياقتاۋ جوسپارلانۋدا. كاسپي جاعاسىنداعى ەلدەردىڭ تەڭىزدى پايدالانۋ جونىندەگى قۇقىقتارى مەن مىندەتتەرىنە بايلانىستى بۇكىل ماسەلەلەردى رەتتەۋگە مۇمكىندىك بەرەتىن كاسپيي تەڭىزىنىڭ قۇقىقتىق مارتەبەسى تۋرالى كونۆەنتسيا ءسامميتتىڭ نەگىزگى قۇجاتى بولىپ سانالادى، - دەدى ق. ءابدىراحمانوۆ.
نۇرسۇلتان نازاربايەۆ كاسپي ماڭى ەلدەرى اراسىنداعى ءوزارا ءتيىمدى ەكونوميكالىق قارىم-قاتىناستاردى نىعايتۋعا باعىتتالعان كونۆەنتسياعا قول قويۋدىڭ ماڭىزدىلىعىن ەرەكشە اتاپ ءوتتى.
جيىن سوڭىندا مەملەكەت باسشىسى بەسىنشى كاسپي ءسامميتىن وتكىزۋگە دايىندىق جونىندەگى جۇمىستاردى جالعاستىرۋدى تاپسىردى.
