سامۇرىق - قازىنا التى ايدا تاپقان تابىسىن جاريالادى

استانا. قازاقپارات - وسى ۋاقىتتىڭ ىشىندە «سامۇرىق-قازىنا» قورى مۇناي مەن ەلەكتر قۋاتىن ءوندىرۋ كولەمىن ارتتىرىپ قانا قويماي، ءبىرقاتار بانكتەردە بۇعاتتالعان دەپوزيتتەرىن الىپ شىقتى.

ول اقشانىڭ ءبارى قورعا قاراستى كومپانيالاردى دامىتۋعا جۇمسالادى، دەپ حابارلايدى قازاقپارات ءتىلشىسى.

«سامۇرىق-قازىنا» ا ق قارجى جانە ەكونوميكا جونىندەگى ديرەكتورى ەرنار جاڭادىلدىڭ ايتۋىنشا، التى ايدا نەگىزگى قىزمەتتەن تۇسكەن كىرىستىڭ كولەمى 3,339 تريلليون تەڭگەنى قۇرادى. بۇل وتكەن جىلدىڭ اتالعان كەزەڭىمەن سالىستىرعاندا 27 پروتسەنتكە ارتىق. ال وپەراتسيالىق تابىستىڭ مولشەرى 428 ميلليارد تەڭگەگە جەتتى. بۇل - جىلدىق جوسپاردىڭ 78 پروتسەنتى. بىلتىر اتالعان كورسەتكىش ەكى ەسەگە تومەن بولعان.

«بۇنداي وزگەرىستەرگە بىرنەشە فاكتور اسەر ەتتى. التى ايدىڭ ىشىندە مۇناي وڭدەۋ كولەمى 13 پروتسەنتكە، ال ەلەكتر ەنەرگيانىڭ ءوندىرىسى 28 پروتسەنتكە ءوستى. بۇدان بولەك، تەمىرجولمەن جۇك تاسىمالى 9 پروتسەنتكە ارتتى. ارينە، مۇناي باعاسىنىڭ كوتەرىلۋى دە ءوز سەپتىگىن تيگىزدى.

«سامۇرىق-قازىنا» قارجىلىق تۇراقتىلىعىن دا كۇشەيتتى. اتاپ ايتقاندا، سىرتقى قارىز 900 ميلليون دوللارعا ازايدى. قازمۇناي گازدىڭ 1,6 ميلليارد دوللارلىق حالىقارالىق وبليگاتسيالارى وتەلدى. ال «سامۇرىق-ەنەرگو» اق 39 ميلليارد تەڭگەنىڭ قارىزىن مەرزىمىنەن بۇرىن تولەپ تاستادى»، - دەدى ە. جاڭادىل ۇكىمەت ۇيىندە وتكەن باسپا ءسوز ءماسليحاتىندا.

ونىڭ ايتۋىنشا، «قازكوممەرتسبانك» ا ق- سىنان 117 ميلليارد تەڭگە كولەمىندەگى بۇعاتتالعان دەپوزيتتەردىڭ اقشاسى كەرى قايتارىلدى. سونداي-اق، تاعى ءبىر بانكتەن تۋرا سونداي 220 ميلليارد تەڭگەنى قايتارۋ جوسپارلانعان. ول قارجى قازاقستان تەمىرجولىنا (75 ميلليارد تەڭگە)، قازاقتەلەكومعا (75 ميلليارد تەڭگە) جانە قازاتومونەركاسىپكە (200 ميلليون دوللار) قارىزعا بەرىلەدى. سونداي-اق، «سامۇرىق-قازىنا» ا ق ءتيىمسىز اكتيۆتەردى ازايتۋ شارالارىن جالعاستىرۋدا.

بۇگىندە ەنشىلەس كومپانيالاردىڭ سانى 359 دان 312 گە دەيىن قىسقاردى. 15 كومپانيا 28,5 ميلليارد تەڭگەگە ساتىلدى. الداعى ۋاقىتتا تاعى 51 اكتيۆ ساتىلادى. بۇدان بولەك، قور ستراتەگيالىق ماڭىزى جوق 102 كومپانيانىڭ قۇرامىنان شىعاتىن بولادى.