ولگا رىپاكوۆا مەن ۆيكتوريا زيابكينا قۇرلىقارالىق كۋبوگقا قاتىسادى
ق ر جەڭىل اتلەتيكا فەدەراتسياسى ءمالىم ەتكەندەي، بۇل جارىس وسىمەن ءۇشىنشى رەت ۇيىمداستىرىلعالى وتىر. وعان ءتورت قۇرلىقتىڭ، ياعني ەۋروپا، امەريكا، افريكا جانە ازيا-مۇحيت ارالدارى ەلدەرىنىڭ قۇرامالارى قاتىسادى.
قۇرلىقارالىق كۋبوكتىڭ باعدارلاماسىندا 37 سايىس ءتۇرى ەنگىزىلگەن (18 ءى ەرلەر اراسىندا، 18 ءى ايەلدەر اراسىندا جانە 4x400 مەترلىك ارالاس ەستافەتا). ءاربىر سايىس بويىنشا سپورتشىلارعا ۇپاي ۇلەستىرىلەدى. سول بويىنشا ۇزدىك قۇرلىقتىق كوماندا انىقتالادى.
ءبىر سايىس تۇرىنەن ءاربىر قۇرلىقتان 2 سپورتشى عانا قاتىسا الادى. شىلدە ايىنىڭ باسىندا بانگكوكتا ازيا جەڭىل اتلەتيكا قاۋىمداستىعىنىڭ كەڭەسى ءوتتى. وندا مۇحيت ەلدەرىمەن بىرلەسىپ جاساقتالاتىن قۇراما ءسوز بولدى.
كەڭەستىڭ شەشىمى بويىنشا قۇراما سپورتشىلاردىڭ بيىلعى ماۋسىمداعى كورسەتكىشتەرىنە بايلانىستى جاساقتالادى. ازىرگە قۇرلىقتىق دوداعا قاتىساتىن اتلەتتەردىڭ العاشقى ءتىزىمى ۇسىنىلدى. ناقتى قۇرام يندونەزياداعى ازيا ويىندارىنان كەيىن بەلگىلى بولادى. الدىن الا ۇسىنىلعان تىزىمگە ءبىزدىڭ ەلدەن ەكى سپورتشى كىرىپ وتىر. ءۇش قارعىپ سەكىرۋدەن ازيا قۇرلىعىنداعى ەڭ ۇزدىك ناتيجەنىڭ يەسى ولگا رىپاكوۆا (14,25 م) مەن 200 مەترگە جۇگىرۋدىڭ كوشباسشىسى ۆيكتوريا زيابكينا (22.73 س) بار.
ەكى سپورتشىعا قۇرلىقارالىق كۋبوكتا ازيا جانە مۇحيت ەلدەرى قۇراماسىنىڭ نامىسىن قورعاۋعا ۇسىنىس ءتۇستى. جەرلەستەرمىز ءوز كەلىسىمدەرىن بەردى. سونداي-اق زيابكيناعا 100 مەترگە جۇگىرۋدەن دە قاتىسۋعا مۇمكىندىك بار.
ايتا كەتەيىك، IAAF- تىڭ قۇرلىقارالىق كۋبوگى ەڭ العاش رەت 2010-جىلى سپليتتە وتكىزىلگەن. حورۆاتيادا قازاقستان اتىنان قاتىسقان ولگا رىپاكوۆا 15.25 مەترگە سەكىرىپ، ازيانىڭ رەكوردىن جاڭارتقان. سونداي-اق ءوزىنىڭ سپورتتىق كارەراسىنداعى ۇزدىك ناتيجەنى تىركەگەن بولاتىن.
اۆتور: كۇنسۇلتان وتارباي
