تۇڭعىش رەت «قايرات» ەۋروپا ليگاسىنىڭ ءۇشىنشى ىرىكتەۋ كەزەڭىنە شىقتى
دەگەنمەن قوس ويىننىڭ ناتيجەسىمەن «قايرات» جارىستى جالعاستىراتىن بولدى، دەپ حابارلايدى قازاقپارات ءتىلشىسى.
بيىل ءبىزدىڭ ەلىمىزدىڭ اتىنان ەۋروكۋبوك ويىندارىنا ءتورت كوماندا قاتىستى. چەمپيوندار ليگاسىندا ەلوردالىق «استانا» باق سىناسا، ەۋروپا ليگاسىندا الماتىنىڭ «قايرات»، قوستانايدىڭ «توبىل» جانە پاۆلوداردىڭ «ەرتىس» كلۋبتارى ەل نامىسىن قورعاۋعا مۇمكىندىك العان ەدى. «ەرتىس» ءبىرىنشى ىرىكتەۋ كەزەڭىنەن ارىگە اسا العان جوق. ليتۆانىڭ «تراكاي» كومانداسىنا (0:0، 0:1) جول بەردى. ءبىرىنشى ىرىكتەۋ كەزەڭىندە گرۋزيانىڭ «سامترەديا» كلۋبىن (1:0، 2:0) ورتا جولدا قالدىرعان «توبىل» ەكىنشى ىرىكتەۋ كەزەڭىندە ارمەنيانىڭ «پيۋنيك» كومانداسىنا ەسە (2:1، 0:1) جىبەردى.
ازىرگە ءۇشىنشى ىرىكتەۋ كەزەڭىنە ەلوردالىق «استانا» عانا جولداما الىپ وتىر. ولار الدىمەن چەرنوگوريانىڭ «سۋتەسكاسىن» جەڭىپ (1:0، 2:0 )، ودان كەيىن دانيانىڭ «ميدتيۋللاندىنان» باسىم ءتۇسىپ (2:1، 0:0)، ەندى حورۆاتيانىڭ «دينامو» (زاگرەب) كومانداسىمەن شەبەرلىك بايقاسادى. ەندىگى ءۇمىت - «قايراتتا». الماتىلىقتار العاشقى ىرىكتەۋ كەزەڭىندە اندوررانىڭ «ەنگوردان» كلۋبىنان قوس ويىننىڭ قورىتىندىسىندا 10:1 ەسەبىمەن (7:1، 3:0) باسىم ءتۇستى.
«قايرات» ءوز الاڭىندا «از الكمااردان» 2:0 ەسەبىمەن باسىم تۇسكەن ەدى. العاشقى مينۋتتان «قايرات» ساپىندا ۆلاديمير پلوتنيكوۆ، عافۋرجان سۇيىمبايەۆ، شەلدون باتو، سەرگەي پوليتيەۆيچ، يان ۆوروگوۆسكي، يسلامبەك قۋات، باۋىرجان يسلامحان، يساەل، جۋان فەليپە، اندرەي ارشاۆين، ادەرينسولا ەسەولا شىقتى.
وتكەن كەزدەسۋدەن كوماندا قۇرامىندا ەشقانداي وزگەرىس جوق. ال «از الكماار» قۇرامىندا ماركو بيزوت، يوناس سۆەنسسون، پانتەليس حاتسيدياكوس، رون ۆلار، توماس اۋەيان، فرەدريك ميدتشە، گۋس تيل، تەۋن كووپمەينەرس، دورين روتاريۋ، فرەد فرايدي، ۋسساما يدريسسي شىقتى.
الماتىداعى كەزدەسۋدە تەۋن كووپمەينەرس پەن دورين روتاريۋ ءبىرىنشى مينۋتتان ويىنعا قوسىلعان جوق ەدى. ولار ماتس سەنتەنس پەن ميرون بواديۋنى الماستىردى. كۇتكەندەگىدەي، «از الكماار» ويىندى وتە قارقىندى باستادى. بىردەن-اق ءبىزدىڭ قاقپاعا لاپ قويدى. وڭ قاناتتان دا، سول قاناتتان دا شابۋىل ءوربىپ جاتتى. بۇل ساتتە «قايرات» فۋتبولشىلارى نەگىزىنەن قورعانىس شەبىندە ءجۇردى دەسەك تە بولادى.
16-مينۋتتا الاڭ يەلەرى ءبىزدىڭ قاقپاعا گول سوقتى. دەگەنمەن، ونى تورەشى وفسايدتان تىس دەپ ەسەپتەمەي تاستادى. ال 21-مينۋتتا اندرەي ارشاۆين «از الكماار» قاقپاشىسىن مازالاپ كوردى. ونىڭ تەپكەن دوبىن اياقپەن زورعا قايتارىپ ۇلگەردى. ويىننىڭ 28-مينۋتىندا الاڭ يەلەرى تاراپىنان وزدەرىنىڭ ايىپ الاڭىندا تۇسىنبەستىك ورىن الدى.
«قايرات» شابۋىلشىسى ادەرسينسولا ەسەولا قاقپاشىمەن بەتپە-بەت شىققان ەدى. قاقپاشى ونى قۇلاتۋدان باسقا امالى قالعان جوق. الاڭ يەلەرى قاقپاسىنا پەنالتي بەلگىلەنىپ، ونى «قايراتتىڭ» كاپيتانى باۋىرجان يسلامحان مۇلتىكسىز ورىندادى. وسىلايشا «قايرات» سىرت الاڭدا ءبىر دوپ سوعىپ، جاعدايىن ودان ءارى تۇزەپ الدى. ويتكەنى، «از الكماار» جارىستى جالعاستىرۋدان ۇمىتتەنسە، ءبىزدىڭ قاقپاعا كەم دەگەندە 4 دوپ سوعۋى قاجەت. ال 42-مينۋتتا گۋس تيل تارازى باسىن تەڭەستىرىپ كەتتى. ويىن 1:1 ەسەبىمەن تەڭ اياقتالدى. ەكىنشى كەزەڭنىڭ 49-مينۋتىندا «قايراتتىڭ» ەسەپتى ۇلعايتاتىن تاماشا مۇمكىندىگى بولعان ەدى. ءوزىنىڭ ايىپ الاڭىندا قورعاۋشىسى بەرگەن دوپتى «از الكماار» قاقپاشىسى ماركو بيزوت ۇستاپ الۋعا ءماجبۇر بولدى.
فۋتبول تالابى بويىنشا ولاي جاساۋعا تىيىم سالىنعان. دەگەنمەن ونى ءبىزدىڭ جىگىتتەر ءوز پايداسىنا جاراتا العان جوق. ال 72-مينۋتتا ادەرينسولا ەسەولا الاڭ يەلەرىنىڭ قاقپاشىسىمەن بەتپە-بەت شىققانىمەن ونى وزىنە ءتيىمدى پايدالانا العان جوق. 92-مينۋتتا ءبىزدىڭ قاقپاعا پەنالتي بەلگىلەندى. ونى تەۋن كووپمەينەرس ءدال ورىنداپ، ەسەپتى 2:1-گە جەتكىزدى. ويىن وسى ەسەپپەن قورىتىندىلاندى. قوس ويىننىڭ ناتيجەسىمەن «قايرات» جارىستى جالعاستىراتىن بولدى.
ەندى ولار ەۋروپا ليگاسىنىڭ ءۇشىنشى ىرىكتەۋ كەزەڭىندە 9-16- تامىز كۇندەرى چەحيانىڭ «سيگما» كومانداسىمەن كەزدەسەدى.
ايتا كەتەلىك، «قايرات» بيىل ءوز تاريحىندا تۇڭعىش رەت اتالمىش جارىستىڭ ءۇشىنشى كەزەڭىنە شىعىپ وتىر. بۇعان دەيىن ولار 6 مارتە اتالمىش دوداعا قاتىسقانىمەن ەكىنشى كەزەڭنەن ارىگە اسا العان جوق ەدى.
