بالقاشتا «اسىقتار» ءمۇسىنى پايدا بولدى

قاراعاندى. قازاقپارات - بالقاش قالاسىندا جاڭا كورنەكتى ورىن پايدا بولدى. م. حامزين اتىنداعى مادەنيەت سارايىنىڭ جانىندا «اسىقتار» سكۋلپتۋرالىق تۋىندىسى ورناتىلدى، دەپ حابارلايدى قازاقپارات ءتىلشىسى.

ءىرى كولەمدى بەس اسىق شىنى تالشىقتان جاسالعان. ءارقايسىسىنىڭ سالماعى - 30 كەلى، ۇزىندىعى - 1,5 مەتر. اسىقتار جەرگە تاستالۋ كەزەگىمەن جاسالعان. الدىمەن الشى، ارتىنان تايكە، ودان كەيىن شىك ورناتىلعان.

الشى - اسىقتىڭ يىرىلگەندە تەگىس تابانى جەرگە ءتيىپ، تۇرىق ءتۇسۋى. ويىن كەزىندە وعان ءبىرىنشى دارەجەلى ءمان بەرىلەدى. تايكە - اسىقتىڭ يىرىلگەندە شۇڭقىرلاۋ تابانى جەرگە ءتيىپ، تۇرىق ءتۇسۋى. ول ەكىنشى دارەجەلى مانگە يە. بۇك - اسىقتىڭ يىرىلگەندە دوڭەس جونى ۇستىنە قاراپ، ەتپەتىنەن جاتىق ءتۇسۋى. ول ءۇشىنشى دارەجەلى مانگە يە. شىك - اسىقتىڭ يىرىلگەندە شۇڭقىر قۇرساق جاعى ۇستىنە قاراپ، شالقاسىنان جاتىق ءتۇسۋى. ول ءتورتىنشى دارەجەلى مانگە يە.