ترياتلوننان ازيا كۋبوگىنا قاتىساتىن قازاقستاندىق سپورتشىلار بەلگىلى بولدى
قۇراما تالىمگەرىنىڭ ايتۋىنشا، ترياتلوننان ازيا كۋبوگىنا قازاقستاننان 8 ەر ادام مەن 5 ايەل قاتىسادى.
ولار: اشراف كامالوۆا، نادەجدا بەكماعانبەتوۆا، اناستاسيا اۆتۋشكو جانە كارينا شۋلگينا، سونداي-اق، الماتى قۇراماسىنا كانديدات قىز بار. ەرلەر اراسىندا ايان بەيسەنبايەۆ، دارىن قونىسبايەۆ، سەمەن پيۆوۆاروۆ، ماكسيم كريات، تەمىرلان تەمىروۆ، مەيىرلان ىسقاقوۆ، الەكساندر ارتۋشكو جانە سانجار كوساريەۆ بولادى. باس باپكەردىڭ ايتۋىنشا، ءبىزدىڭ كوماندالار بۇل جارىستى دايىندىقتىڭ كەزەكتى كەزەڭى رەتىندە قاراستىرادى.
ياعني سپورتشىلاردىڭ قازىرگى دەڭگەيىن انىقتاۋ ءۇشىن ماڭىزدى بولىپ سانالادى. اسىرەسە وليمپيادا ويىندارىنا تۇسۋگە قاجەت بولاتىن جەكە الەمدىك رەيتينگ ەسەبىنە رەيتينگتىك حالىقارالىق ۇپايلاردى جيناۋ ءۇشىن قاجەت.
الماتىداعى ازيا كۋبوگى قۇرلىقتىق ازيا كۋبوگى دارەجەسىنە يە بولعاندىقتان، قاتىسۋشىلار اراسىندا تەك ازيا ەلدەرى عانا ەمەس، سونداي-اق، ەۋروپا سپورتشىلارى دا بار. بۇل ستارتتىڭ الەمدىك رەيتينگتە ۇپاي جيناۋعا مۇمكىندىك بەرەتىنى انىق. الماتىداعى ستارتتا كاسىبي سپورتشىلاردا كوماندالىق ەسەپ بولمايدى. مۇندا تەك جەكە ەسەپتىڭ ناتيجەلەرى شىعارىلادى. اۋەسقويلار قاشىقتىققا ءوز بەتتەرىنشە نەمەسە كوماندا قۇرامىندا شىعا الادى.
4- تامىزدا 750 مەتر سپرينت قاشىقتىقتا 20+ شاقىرىم ۆەلو 5+ شاقىرىم جۇگىرۋدەن جارىس وتەدى. وعان كاسىپقوي سپورتشىلار قاتىسادى. 16 ەلدەن 57 سپورتشى تىركەلگەن. 5- تامىزدا كاسىپقويلار بۇدان ەكى ەسە قاشىقتىقتا (1500 مەتر ءجۇزۋ 40+ شاقىرىم ۆەلو 1+ شاقىرىم جۇگىرۋ) سايىسقا تۇسەتىن بولادى. مۇنداي قاشىقتىق تەك وليمپيادا ويىندارىندا بولعان. بۇعان 16 سپورتشى مەن 10 كوماندا (ءار كوماندادا 3 سپورتشىدان) تىركەلدى.
«وزدەرىڭىزگە بەلگىلى، وليمپيادا ويىندارىندا تەلەكورسەتىلىمدەرگە باسىمدىق بەرىلەدى. قازىرگى تاڭدا وسى جولعى وليمپيادالىق قاشىقتىقتى سپرينتەرلىك قاشىقتىققا دەيىن قىسقارتۋ ماسەلەسىن قاراستىرىپ وتىرمىز. سوندىقتان كاسىبي اتلەتتەر سپرينتەرلىك تە، وليمپيادالىق قاشىقتىقتا دا جارىساتىن بولادى»، - دەدى قازاقستان ترياتلون فەدەراتسياسىنىڭ اتقارۋشى ديرەكتورى اسىلجان دوستياروۆ.
استاناداعى كاسىپقوي اتلەتتەرگە ارنالعان الەم كۋبوگىندا وليمپيادالىق قاشىقتىق بولسا، الماتىداعى جارىستار سپرينتەرلىك قاشىقتىقتا وتەدى. ازيا كۋبوگىن وتكىزۋ ورنى رەتىندە الماتىداعى سايران كولى تاڭدالعان. ۇيىمداستىرۋشىلاردىڭ ايتۋىنشا، كولدىڭ سۋى حالىقارالىق ستاندارتتارعا ساي كەلىپ، ارنايى تەكسەرىستەن وتكىزىلدى.
سونداي-اق، ءدال قازىر اباتتاندىرۋ جۇمىستارى قولعا الىنعان. اكىمدىك جاعاجايداعى قۇمدى اۋىستىرىپ، 60 ورىندىق ورناتقان، جاڭا ۋرنالار قويىلعان. جول كولدىڭ شىعىس جاعىمەن ءوتىپ، دەمالۋشىلار ءۇشىن ۋاقىتشا جابىلادى. كورەرمەن تريبۋنالارى كولدىڭ جاعاسىنا ورناتىلادى.
