اتىراۋدا شاعىن قايىقتار شەرۋى ءوتتى

اتىراۋ. قازاقپارات - اتىراۋدا «ادال جول» مارافونى اياسىندا شاعىن قايىقتار شەرۋى ءوتتى، دەپ حابارلايدى قازاقپارات ءتىلشىسى.

اتىراۋ قالالىق اكىمدىگى باسپا ءسوز قىزمەتىنىڭ حابارلاۋىنشا، شەرۋگە شامامەن 30 سۋ كولىگى - 20 قايىق، 2 ياحتا، 6 گيدروتسيكل جانە 1 كەمە قاتىسقان. سىبايلاس جەمقورلىققا قارسى مارافوننىڭ قۇرمەتتى قوناقتارى- كاراتەدەن الەم چەمپيونى - اسەل سەرىكوۆا، مۋايتايدان الەم چەمپيوناتىنىڭ قولا جۇلدەگەرى - ديدار بولاتوۆ، كيكبوكستان الەم كۋبوگىنىڭ يەگەرى ازامات وتەمىسوۆ.

 

قاتىسۋشىلار مارافوننىڭ جالاۋىن جانە قازاقستاننىڭ مەملەكەتتىك تۋىن كوتەرىپ، ورتالىق كوپىردەن رەترو ساياباققا دەيىن ءجۇرىپ ءوتتى. اتىراۋ قالاسىنىڭ تۇرعىندارى مەن قوناقتارى ءۇشىن كونتسەرتتىك باعدارلاما ۇيىمداستىرىلدى.

اتىراۋ قالاسى اكىمىنىڭ ورىنباسارى مەيىرىم قالاۋيدىڭ ايتۋىنشا، بۇل اكسيانىڭ ماقساتى - قوعامداعى سىبايلاس جەمقورلىققا قارسى مادەنيەتتى قالىپتاستىرۋ، سونداي-اق حالىقتىڭ، ونىڭ ىشىندە جاستاردىڭ بارلىق توپتارىنىڭ وكىلدەرىن سىبايلاس جەمقورلىققا قارسى قوزعالىسقا تارتۋ.

«مۇنداي شارالاردى وتكىزۋ ارقىلى ءبىزدىڭ مەملەكەتىمىزدىڭ سىبايلاس جەمقورلىققا قارسى ساياساتى بولاشاقتا وڭ ناتيجەسىن بەرەدى»، - دەيدى مەيىرىم قالاۋي.