تۇركيادا ءولىم جازاسى ەنگىزىلۋى مۇمكىن
ول ەڭ اۋىر جازانىڭ ەل اۋماعىندا قولدانىسقا ەنگىزىلۋىن پارلامەنت ماقۇلدايتىن بولسا، ءتيىستى زاڭ جوباسىنا بىردەن قول قويۋعا دايىن ەكەنىن جەتكىزدى.
بۇل جايىندا تۇرىكتەردىڭ Anadolu اقپارات اگەنتتىگى حابار تاراتتى. ونىڭ ايتۋىنشا، كىسى ولتىرگەن ادامعا «قانعا - قان، جانعا - جان» پرينسيپى بويىنشا ەڭ اۋىر جازا لايىق بولماق.
ايتا كەتۋ كەرەك، تۇرىك باسشىسى ءولىم جازاسى تۋرالى مۇنداي مالىمدەمەنى ءبىرىنشى رەت جاساپ تۇرعان جوق.
وسى ۋاقىتقا دەيىن تالاي رەت جاساعان بولاتىن. ماسەلەن، 2016 -جىلدىڭ جاز مەزگىلىندە كۇللى تۇركيانى ءدۇر سىلكىندىرگەن مەملەكەتتىك توڭكەرىستەن سوڭ وسىنداي مالىمدەمە جاساعان ەدى. ءوز دەگەنىنە بىرتىندەپ بولسا دا از ۋاقىتتىڭ ىشىندە قول جەتكىزە بىلگەن قازىرگى تۇرىك باسشىسىنىڭ العان بەتىنەن قايتپايتىن رايىنا قاراعاندا اتالعان ەلدە ەڭ اۋىر جازانىڭ ەنگىزىلۋى كۇمان تۋدىرمايدى. وسىلايشا، تۇركيانى «اشسا - الاقانىندا، جۇمسا - جۇدىرىعىندا» ۇستاپ، ءبىر بيشىكپەن ورگىزىتىپ-جۋساتاتىن بولادى. مۇنى نەگە ايتىپ وتىرمىز؟ ادامنىڭ ءومىرى مەن بوستاندىعى، ەركى مەن قالاۋى باستى ورىنعا قويىلاتىن قازىرگى دەموكراتيالىق قۇندىلىقتار وركەن جايعان باتىس ەلدەرىندە مۇنداي جازا «ورتا عاسىرعا ءتان» - اۆتوريتارلى ەلدەرگە ءتان كورىنىس رەتىندە قابىلدانادى.
دەسە دە ءولىم جازاسىنا قاتىستى تۇسىنىك ءار ەلدە ءارقالاي قابىلدانادى. ماسەلەن، ءولىم جازاسى قىتايدىڭ ەكونوميكالىق وركەندەۋىنە الىپ كەلگەن ماڭىزدى قادامداردىڭ ءبىرى رەتىندە باعالانىپ وتىرعانىن دا جاسىراۋعا بولمايدى. جەڭ ۇشىنان جالعاسقان سىبايلاس جەمقورلىقتىڭ الدىن الۋدا ءولىم جازاسىنىڭ كومەگى كوپ كورىنەدى.
ءبىزدىڭ ايتقىمىز كەلگەنى، ءولىم جازاسىنىڭ قانشالىقتى دۇرىستىعى ءيا بولماسا بۇرىستىعى ەمەس، كەيىنگى كەزدە ەڭ اۋىر جازانى قايتا ەنگىزۋگە مۇددەلى ەلدەردىڭ ءبىر عانا تۇركيامەن شەكتەلمەيتىندىگىندە بولىپ وتىر.
ماسەلەن، ەستەرىڭىزدە بولسا، شري-لانكادا ءولىم جازاسىنىڭ ەنگىزىلۋى مۇمكىن ەكەنى تۋراسىندا جۋىردا حاباردار ەتتىك. قولىنا رەسۋرستى شوعىرلاندىرعان باتىس ەلدەرىنىڭ قاس-قاباعىنان قايمىعىپ، ءولىم جازاسىنا موراتوري جاريالاعان ەلدەردىڭ ءوزى ءبىرشاما.
ال تۇركياداعى جاعداي باسقاشا. مۇندا ەڭ اۋىر جازا ەڭ الدىمەن قازىرگى تۇرىك باسشىسىنىڭ ءوز بيلىگىن نىعايتۋىمەن بايلانىستى ەنگىزىلۋى مۇمكىن.
بۇل جازا راسىمەن دە تۇركيانىڭ العا باسقان قادامىن كەيىن تارتاتىن، «ورتا عاسىرعا» ورالىپ، كەرى كەتۋدىڭ كورىنىسى بولىپ قالماق. ەڭ وكىنىشستىسى - وسى.
islam.kz
