استانادا بالانىڭ قولا ءمۇسىنىن قولدى قىلعان ۇرىعا ۇكىم شىقتى

استانا. قازاقپارات - استانا قالالىق سوتى بالانىڭ قولا ءمۇسىنىن جانە ۇلى وتان سوعىسى جاۋىنگەرلەرىنە ورناتىلعان ەسكەرتكىشتىڭ ارىپتەرىن قولدى قىلعان ۇرىعا ۇكىم شىعاردى، دەپ حابارلايدى قازاقپارات ءتىلشىسى.

«2018 -جىلعى 20 -ماۋسىمدا استانا قالاسى، سارى ارقا اۋداندىق №2-سوتى جالپى قۇنى 8 ميلليون تەڭگەدەن اساتىن مۇلىكتى ۇرلاعان ەر ادامعا قاتىستى ۇكىم شىعاردى. سوتتىڭ ۇكىمىمەن ايىپتالۋشى 4 جىل مەرزىمگە باس بوستاندىعىنان ايىرىلدى. ول قىلمىستىق- اتقارۋ جۇيەسىنىڭ قاۋىپسىزدىگى بارىنشا كۇشەيتىلگەن مەكەمەسىندە جازاسىن وتەيدى»، - دەپ مالىمدەدى قالالىق سوتتىڭ باسپا ءسوز قىزمەتى.

ءىس ماتەريالدارىنا قاراعاندا، ۇستىمىزدەگى جىلدىڭ 20 -ناۋرىزىندا، 5 جانە 7 -ءساۋىر كۇندەرى ەر ادام ۇلى وتان سوعىسىنىڭ جاۋىنگەرلەرىنە ورناتىلعان ەسكەرتكىشتىڭ مەتالل ارىپتەرىن، سيفرلارىن، لاۆر جاپىراعى تارىزدەس القاگۇلدى قولدى ەتكەن. ال 23 -ناۋرىزدا «1932-1933 -جىلدارداعى اشارشىلىق قۇرباندارىنا» ورناتىلعان ەسكەرتكىش كەشەنىنەن بالانىڭ قولا ءمۇسىنىن ۇرلاعان.

2018 -جىلعى 1 -تامىزدا استانا قالاسىنىڭ قىلمىستىق ىستەر جونىندەگى اپەللياتسيالىق سوت القاسى ءبىرىنشى ينستانسيانىڭ ۇكىمىن وزگەرىسسىز قالدىردى.

ۇكىم زاڭدى كۇشىنە ەندى.

سوتتا ايىپتالۋشىنىڭ ۇرلاعان زاتتارىن مەتالل سىنىقتارىن قابىلداۋ پۋنكتىنە وتكىزگەنى ايتىلدى. سوت وتىرىسىندا سوتتالۋشى ءوز قىلمىسىنا وكىنەتىنىن ايتتى.

ايتا كەتەرلىگى، ەسكەرتكىشتەردى ۇرلاعان ادام بۇرىن دا ەكى رەت اۋىر قىلمىس جاساعانى ءۇشىن جازالانعان.