اتىراۋدا اجىراسقاندار سانى ارتتى

اتىراۋ. قازاقپارات - اتىراۋدا نەكە بۇزۋ بىلتىرعىمەن سالىستىرعاندا %5 عا كوبەيگەن.

كوبىنەسە 27-50 جاس ارالىعىنداعى جۇبايلاردىڭ اجىراسۋى ءجيى كەزدەسەدى، دەپ حابارلايدى قازاقپارات ءتىلشىسى.

بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينيگتە اتىراۋ قالالىق جۇمىسپەن قامتۋ، الەۋمەتتىك باعدارلامالار جانە ازاماتتىق حال اكتىلەرىن تىركەۋ ءبولىمىنىڭ باسشىسى نۇرلى حابييەۆا ايتتى. سپيكەردىڭ ايتۋىنشا، ەگەر وتكەن جىلدىڭ ءبىرىنشى جارتىجىلدىعىندا نەكە بۇزۋشىلار سانى 496 بولسا، بيىلعى 6 ايدا 521 گە دەيىن ءوستى.

«سوڭعى ەكى جىلداعى كورسەتكىشتەردى سالىستىرساق، نەكە بۇزۋ بىلتىرعىمەن سالىستىرعاندا 5 پايىزعا كوبەيگەن. كوبىنە 27-50 جاس ارالىعىنداعى جۇبايلار ءجيى اجىراسادى. سەبەبىن مىنەزدەرىنىڭ كەلىسپەۋشىلىگىنەن جانە ورتاق سابيلەرىنىڭ بولماۋىنان دەپ تۇسىندىرەدى. جالپى، قالپىنا كەلتىرۋ ءۇشىن شىعارىلعان اكتى بىلتىرعىمەن سالىستىرعاندا ەكى ەسەگە كوبەيىپ وتىر، سەبەبى بالا اسىراپ الۋ بىلتىرعىعا قاراعاندا كوپ»، - دەيدى ن. حابيەۆا.

اتىراۋ قالالىق جۇمىسپەن قامتۋ، الەۋمەتتىك باعدارلامالار جانە ازاماتتىق حال اكتىلەرىن تىركەۋ ءبولىمىنىڭ مالىمەتىنشە، اتىراۋدا ءولىم كورسەتكىشى 2017 -جىلعا قاراعاندا 5,9 پايىزعا وسكەن، ونىڭ ىشىندە 1 جاسقا دەيىنگى بالالاردىڭ ءولىمى كوپ جانە جۇرەك، باۋىر، بۇيرەك اۋرۋى سالدارىنان قايتىس بولۋ فاكتىلەرى كوبەيىپ وتىر.