ەكسپو - ەلوردامىزدىڭ باستى وقيعالارىنىڭ الاڭى
وسى سەنبى، تامىزدىڭ 4 -كۇنى ساعات 20:00-دە ەكسپو كورمە كەشەنىنىڭ جازعى ساحناسىندا SMASH ساحنالىق لاقاپ اتىمەن تانىلعان رەسەيلىك ايگىلى ديدجەي جانە مۋزىكالىق پروديۋسەر - اندرەي شيرمان ونەر كورسەتەدى. DJ سەتتى قازاقستاندىق ديدجەينگ جۇلدىزدارى - نۇربەرگەن ماحامبەتوۆ پەن DJ Timoffey قولدايتىن بولادى.
تامىزدىڭ 5 -كۇنى ەكسپو جەكسەنبىلىك كەشتى قازاقستاننىڭ تانىمال ارتىستەرى ايقىن جانە Renzo توبىمەن وتكىزۋگە شاقىرادى.
تامىزدىڭ 11 -كۇنى حالىقتىڭ سۇيىكتى ءانشىسى ەركە ەسماحان جانە قازاقستانداعى كلاسسيكالىق مۋزىكا مەن پوپ، روك، ەلەكترواۋەننىڭ كروسسوۆەر-سينتەز باعىتىن كاسىبي ورىنداي بىلگەن Mezzo توبىنىڭ كونسەرتى وتەدى.
ەكسپو جازعى ساحناسىنداعى كونسەرتتىك باعدارلامالار ساعات 20:00-دە باستالادى. كەلۋشىلەر ءۇشىن كىرۋ تەگىن. كونسەرت باستالماس بۇرىن «نۇر الەم» سفەراسىندا ارتىستەر فوتو جانە اۆتوگراف-سەسسيا وتكىزەدى.
كونسەرتتەردەن بولەك ەكسپو جازعى ساحناسى جاسوسپىرىمدەرگە دە ارناپ كەرەمەت سىيلىق ازىرلەدى. ولاردى 5-12 -تامىز ارالىعىندا ساعات 19:00-دە «ارماننىڭ وقيعاسى» اتتى ەرتەگى قويىلىمى كۇتەدى.
سونىمەن قاتار، تامىزدىڭ 7 سىنەن قىركۇيەكتىڭ 26 نا دەيىن «نۇر الەم» سفەراسىندا بالالار مەن اتا-انالارعا «روبوتتار بالى» ينتەراكتيۆتى كورمەسىن تاماشالاۋ مۇمكىندىگى تۋىپ تۇر. روبوشوۋ - امەريكا، ەۋروپا، وڭتۇستىك كورەيا جانە جاپونيا روبوتوتەحنيكاسىنىڭ سوڭعى جەتىستىكتەرىن جانە زاماناۋي روبوتتار سلەتىن ۇسىنادى. قويىلىمنىڭ باستى حەدلاينەرى اعىلشىندىق روبوت - گۋمانويد تەسپيان. روبوت سويلەيدى، ىمداردى كوشىرەدى، ءان ايتادى، ءبي بيلەيدى، كۇلەدى، جىلايدى، ءتىپتى شەكسپيردىڭ شىعارمالارىن دا وقىپ بەرە الادى. سونىڭ ارقاسىندا زاماناۋي تەاتر قويىلىمدارىندا بىرنەشە رەت ويناعان. شوۋدى تاماشالاۋ ءۇشىن «نۇر الەم» سفەراسىنا بيلەت الۋىڭىز قاجەت.
ايتا كەتۋ كەرەك، كورەرمەندەر تامىزدىڭ 15 -كۇنى ساعات 20:00-دە ەكسپو كونگرەسس- ورتالىعىندا وتەتىن رەسەيلىك تانىمال ءانشى ديما بيلاننىڭ كونسەرتىنە بيلەت ساتىپ الىپ، «نۇر الەم» سفەراسىنا اشىق داتامەن تەگىن بيلەت الا الادى. ءارتىس عالامات قويىلىمى بارىسىندا حالىققا تانىمال اندەرىمەن قاتار سوڭعى ءان جيناعىنا ەنگەن تۋىندىلارىن دا ورىندايدى. شىلدە ايىندا جوسپارلانعان كونسەرتكە ساتىپ الىنعان بيلەتتەر - جارامدى.
ەكسپو كورمە كەشەنىندە قالا تۇرعىندارى مەن قوناقتارى «نۇر الەم» سفەراسىن تاماشالاپ قانا قويماي، ساياباق اۋماعىندا سەرۋەندەپ، جازعى ساحنا مەن كونگرەسس- ورتالىقتا وتەتىن وتاندىق جانە شەتەلدىك ارتىستەرىنىڭ قاتىسۋىمەن كونسەرتتەردەن ءلاززات الىپ، سونداي-اق، ءدامحانا، مەيرامحانا، فۋدكورتتاردا قولجەتىمدى باعاعا تاماقتانا وتىرىپ عاجاپ وتتى شاشۋ سۋبۇرقاق شوۋىن قىزىقتاي الادى.
كەلۋشىلەردىڭ جايلىلىعى ءۇشىن ەكسپو اۋماعىندا جەراستى تۇراعى جۇمىس ىستەيدى. وعان تۇرار رىسقۇلوۆ كوشەسى جاعىنان كىرۋگە بولادى.
