ەرلەر ۇيلەنگەننەن سوڭ نەنى ۇمىتادى؟

 استانا. قازاقپارات - ەر ازاماتتار ۇيلەنگەننەن سوڭ قانداي قىلىقتاردان ادا بولىپ، نە نارسەلەردى ۇمىتا باستايدى ەكەن؟

جىلى ءسوز

«مەن سەنى سۇيەمىن» دەپ ايتىپ قۇتىلامىن دەپ ويلاماڭىز. ءيا، قىز جۇرەگىن جاۋلاماي تۇرىپ «مەن سەنى سۇيەمىندى» ايتۋ قيامەت-قايىم بولاتىن. ارەڭ دەگەندە ايتىپ، كەيىننەن بۇل ءسوز تەك قىز جۇرەگىنە ارنالعان كىلت سەكىلدى بولىپ قالادى. قۇپيا ءسوز سەكىلدى جۇمسالاتىن بۇل ءسوزدى قىزدار قاشان دا كۇتەدى. ءسىز ول قىزبەن ۇيلەنىپ، وتباسىلى بولساڭىز دا... بالالى-شاعالى بولساڭىز دا... ونى سۇيەسىز بە؟ ەندەشە، سۇيەتىنىڭىزدى ايتۋدان جالىقپاڭىز. ايەل ادام ەرىنىڭ تاراپىنان ايتىلاتىن مۇنداي سوزدەردى قاي جاستا بولسا دا تىڭداۋعا ءازىر.

گۇل سىيلاۋ

گۇل ساتاتىن دۇكەندەگى ساتۋشىلار ءسىزدى جاقسىلاپ تانىپ العانشا گۇل سىيلاۋدى دوعارماۋشى ەدىڭىز. اڭساعان ارۋىڭىزعا قولىڭىز جەتىپ، بۇگىندەرى ەكەۋىڭىز شاڭىراق كوتەرىپ، بىرگە ءومىر ءسۇرىپ جۇرسىزدەر. ال ەندى ويلانىڭىزشى، ءسىز وعان سوڭعى رەت قاشان گۇل سىيلاپ ەدىڭىز؟ تۇرمىسقا شىعۋعا ۇسىنىس جاساعاندا ما؟ ودان بەرى قانشا ۋاقىت ءوتتى؟ تاڭ اتقاننان تەرەزەسىنە قويىپ كەتۋشى ەدىڭىز... كەش باتقاندا كۇلىمسىرەپ ارتىڭىزعا جاسىرىپ اكەلىپ تۇرۋشى ەدىڭىز... سونىڭ ءبارىن ءسىز ۇمىتساڭىز دا، جارىڭىز ۇمىتقان ەمەس.

 اتاۋلى كۇندەر

سىزدەردىڭ ەڭ العاش تانىسقان كۇندەرىڭىز... جارىڭىزعا ەڭ العاش تۇرمىسقا شىعۋعا ۇسىنىس جاساعان كۇن... سىزدەر ۇيلەنگەن كۇن... «قاي كۇنى ەدى؟» دەپ ويلانىپ وتىرسىز با؟ مۇنداي كۇندەردى جىگىتتەر ۇيلەنبەي جاتىپ تا ەستە ونشا ساقتاي بەرمەيدى. ارينە، ءبارى ەمەس. ءسىزدىڭ ەسەبىڭىزشە، جارىڭىزبان وتاسقانىڭىزعا ەكى جىل بولۋى مۇمكىن. ءبىراق ايەلىڭىزدىڭ ەسەبىنشە 1 جىل، 8 اي، 19 كۇن بولدى.

ۋادە

جىگىتتەر ۇيلەنبەي تۇرىپ كوپ ۋادە بەرەدى. ءبىراق ولاردىڭ كەيبىرىن ۇيلەنىپ العان سوڭ ورىنداي الماي جاتادى. تاعدىردىڭ تارام جولدارى ايتقانىمىزعا كونە بەرمەيتىنىن ەسكەرسەك، مۇنى ەلەمەۋگە دە بولادى. ءبىراق الار قىزىن ۇلدە مەن بۇلدەگە وراماق بولىپ، كەيىننەن ءوزىن ءوزى جوعالتىپ الاتىن ەرلەر دە جوق ەمەس.

الاڭسىز اقشا شاشۋ

وتباسى بولعان سوڭ، تۇرمىستىق قاجەتتىلىكتەر ءۇشىن قاراجات كەرەك-اق. مەيلىنشە، كىرىستىڭ كوپ، شىعىستىڭ از بولعانىن قالايسىز. سول سەبەپتى بوسقا تەڭگە جاراتۋدى دوعارا باستايسىز. ۇنەمدەۋدى ۇيرەنىپ، بۇرىن ءبىر ءوزىڭىز عانا بولساڭىز، بۇگىن ەكى ادام ءۇشىن جۇمىس جاسايتىن بولاسىز.

دوستارعا كوڭىل ءبولۋ

كوبىنە ەر ادامدارعا قاراعاندا ايەل ادامدار تۇرمىسقا شىققان سوڭ بۇرىن بىرگە جۇرگەن قۇربىلارىمەن اراسىن ۇزە باستايدى. ال ەر ادامداردىڭ ىشىندە دە مۇنداي جوق ەمەس. بالا-شاعانى اسىراۋدىڭ قامىمەن كەي ەر ازاماتتار دوستارىنا باياعىداي كوڭىل ءبولۋدى دوعارادى.

سەرىلىك قۇرۋ

سەنىمدى سەرىگىن تاپقان ەر جىگىت ۇيلەنگەن سوڭ سەرگەلدەڭگە ءتۇسىپ سەرىلىك ەتۋدى قويعانى ءجون. مۇنداي ءجۇرىستى ءبارى بولماسا دا، ەس توقتاتقان ەستى ەر جىگىت ۇمىتارى ءسوزسىز.