14:47, 02 - تامىز 2018 | GMT +5
قوستانايدا تراكتور زاۋىتى سالىناتىن بولدى
قوستاناي. قازاقپارات - قوستاناي وبلىسىندا ليفت جاسايتىن زاۋىتتىڭ قۇرىلىسى ورتا جولدا توقتادى. قوستاناي يندۋستريالىق ايماعىندا ونىڭ ورنىنا «كيروۆەتس» تراكتورلارىن شىعاراتىن زاۋىت ىسكە قوسىلادى،
دەپ حابارلايدى قازاقپارات ءتىلشىسى قوستاناي وبلىسى اكىمىنىڭ ورىنباسارى مەيىرجان مىرزاليەۆكە سىلتەمە جاساپ.
م. مىرزاليەۆ ليفت جاساۋ جوباسىنىڭ توقتاتىلۋى رەسەيدىڭ «VEK» كومپانياسىنىڭ قارجىلىق قيىندىقتارىمەن بايلانىستى ەكەنىن ايتتى.
«ۇستىمىزدەگى جىلى رەسەيلىك تاراپپەن ليفت شىعارۋدى جوسپارلاعان بولاتىنبىز. ءبىراق ەكاتەرينبۋرگتىك كومپانيا ارتىنشا جوبادان باس تارتتى. ولاردا قارجى جەتىسپەگەن بولۋى مۇمكىن»، - دەدى اكىم ورىنباسارى.
ليفت شىعاراتىن زاۋىتتىڭ ءبىر عيماراتى وبلىستىڭ بيۋدجەت قاراجاتتارى ەسەبىنەن بوي كوتەرىپ ەدى. ەندى ول تراكتور قۇراستىراتىن زاۋىتقا بەرىلەدى.
«رەسەيلىك كومپانيا مينسك تراكتور زاۋىتىمەن ىنتىماقتاستىقتا زاۋىتتى ىسكە قوسادى. جوسپار بويىنشا مۇندا جىلىنا 3 مىڭعا دەيىن تراكتور شىعارىلادى»، - دەدى ول.
