پاۆلوداردا زاعيپتار مەن ناشار كورەتىن جاندار قازاق ءتىلىن ۇيرەندى
«كۇن ساۋلەسى» جوباسىنىڭ اۆتورى، «انا ءتىلى» ورتالىعىنىڭ ديرەكتورى شولپان كەنجيكوۆا قازاق ءتىلىن ۇيرەتۋ كۋرسى ەكى ايعا جالعاسقانىن ايتادى.
«بۇل جوبامدى ۇسىنعان كەزدە وبلىس اكىمى بولات باقاۋوۆ بىردەن قولداۋ كورسەتتى، - دەدى شولپان كەنجيكوۆا. - 30 ادامدى ءتورت توپقا ءبولىپ وقىتتىم. كۋرسقا ارنايى ادىستەمەلىك قۇرال رەتىندە كىتاپ تا شىعارىلدى. زاعيپ جاندارعا ارنالعان باسپانىڭ ارنايى برايل جۇيەسى بار. سول جۇيەمەن باسىپ شىعاراتىن پرينتەر قۇرالدارى تەك ورىس، اعىلشىن تىلىندە ەكەن. قازاق تىلىندە جوق بولعاندىقتان تىلدەردى دامىتۋ باسقارماسى قارجى ءبولىپ، مامانداردى جالداپ قولمەن باسىپ شىعارتتى. «كەلىڭىزدەر، قازاقشا سويلەسەيىك!» اتتى كىتاپقا مەملەكەتىك ءتىلدى ۇيرەتەتىن ساباقتار ەنگەن. 10 شاقتى ادام وزگە ۇلت وكىلدەرى بولدى»، - دەيدى ول.
وبلىستىق كوزى كورمەيتىن جانە ناشار كورەتىن ازاماتتارعا ارنالعان ارنايى كىتاپحاناسىندا 30 ادامعا كۋرستى اياقتاعاندارى جونىندەگى سەرتيفيكاتتار تابىس ەتىلدى. «كۇن ساۋلەسى» جوباسىنا قاتىسۋشى ءاسيا تولەۋبايەۆا ورىس مەكتەپتەرىنە باراتىن شوبەرەلەرىنە قازاقشا ۇيرەتەتىنىن جەتكىزدى. - ءوزىم 72 جاستامىن، - دەدى ءاسيا تولەۋبايەۆا. - قازاقشا سويلەي الامىن. ءبىراق كوپ بىلەم دەپ ايتۋعا بولمايدى. بىلمەگەنىمىزدى ۇيرەندىك. ەندى نەمەرە- شوبەرەلەرىمە ۇيرەتەتىن بولامىن. كۋرسىمىز جايلى ءوتتى. ەمىن- ەركىن اڭگىمەلەسىپ، سىر شەرتىسە وتىرىپ، وتكىزىلگەن ساباقتار ارقىلى قابىلداۋ جەڭىل بولدى. ءار ساباعىمىزدا ءشاي ءىشىپ، ءان ايتىپ كوڭىل كوتەرىپ وتىرىپ ۇيرەنۋگە كىرىستىك. ۇستازىمىز قىسقاشا اڭگىمەلەر ايتتى. ولاردى ورىسشاعا اۋداردىق» .
56 جاستاعى ەلەنا لەونتيەۆا اتى- ءجونى، مەكەنجايىنان باستاپ بىرنەشە سويلەمدى قازاقشا ايتاتىن دارەجەگە جەتىپ قالعانىن جەتكىزدى. - بۇرىندارى دا قازاق ءتىلىن ۇيرەنگەنمىن، - دەدى ەلەنا لەونتيەۆا. - قوعامداستىعىمىز بار. سول ۇيىمدا بىرنەشە كۋرستار ءوتتى. بۇل جولعى جوبادا تەرەڭدەتىپ وقىدىق. جالعاۋلاردى، داۋىستى، داۋىسسىز دىبىستاردى ۇيرەندىك. ءان ايتىپ، ولەڭدەر جاتتادىق. سوزدىك قورىم ەداۋىر مولايىپ قالدى. بىرنەشە سويلەمدى ەركىن ايتا الامىن.
سونداي- اق «كۇن ساۋلەسى» جوباسىنىڭ جەتەكشىسى شولپان كەنجيكوۆا جوباعا قاتىسۋشىلارمەن تابيعات اياسىندا دەمالۋعا شىعاتىندارىن اتاپ ءوتتى. - مۇنداي جاندار وزدەرىن ەشكىمگە كەرەكسىز سەزىنبەسىن، قولداۋشىلارى بار ەكەنىن ءبىلسىن دەگەن نيەتپەن تابيعاتقا ساياحاتقا شىقپاقپىز. اڭگىمەلەرىنىڭ اراسىندا كوپ سىرتقا شىقپايتىنىن دا ەستىپ قالدىم. سوندىقتان 24 تامىز كۇنى كۋرسقا قاتىسۋشىلارمەن ۋسولكا شاعىن اۋدانى ماڭىنا تابيعات اياسىنا دەمالىسقا شىعاتىن بولامىز، - دەدى شولپان كەنجيكوۆا.
ايتا كەتەيىك، «كۇن ساۋلەسى» جوباسى اياسىندا كوزى كورمەيتىن جانە ناشار كورەتىن جاندارعا قازاق ءتىلىنىڭ گرامماتيكاسى، ماقال- ماتەلدەر، ولەڭدەر، اڭگىمەلەر ۇيرەتىلدى.
