قىزىلوردالىق جاس عالىم شۇباتتى ۇزاق ساقتايتىن اشىتقى ويلاپ تاپتى

استانا. قازاقپارات - قىزىلوردالىق ونەرتاپقىش بايان دۇيسەنبەك شۇباتتى ۇزاق ۋاقىت ساقتاي الاتىن اشىتقى جاساپ شىعاردى، دەپ حابارلايدى قازاقپارات ءتىلشىسى.

اتالمىش جوبا بۇل باعىتتا قولعا الىنعان جۇمىستىڭ العاشقىلارىنىڭ قاتارىندا سانالادى. جاڭا اشىتقى ارقىلى شۇباتتى 5 ايعا دەيىن ساقتاۋعا تولىق مۇمكىندىك بار. سونىڭ ناتيجەسىندە قازىردىڭ وزىندە بۇل ونىمگە سۇرانىس ارتىپ كەلەدى.

جاس ونەرتاپقىش ەۋرازيا ۇلتتىق ۋنيۆەرسيتىنىڭ بيوتەحنولوگيا ماماندىعىن ۇزدىك بىتىرگەن. ول قازىرگى تاڭدا الماتى تەحنولوگيا ۋنيۆەرسيتەتىندە ماگيستراتۋرادا وقىپ ءجۇر. سونداي- اق، ول جوعارى بىلىممەن قوسا ارنايى كۋرستاردان ءوتىپ، شۇبات وڭدەۋ ىسىنە ابدەن ماماندانىپ الدى. 2016 -جىلى شيەلى اۋدانىنداعى «ارۋ انا» كاسىپورنىندا ەڭبەك جولىن باستادى. قازىر وڭدەلگەن تۇيە سۇتىنەن ءدام تاتقان جەرگىلىكتى ازاماتتار وعان جوعارى باعاسىن بەرىپ وتىر.

جاس ونەرتاپقىش ءوز ءىسىن ءالى دامىتقىسى كەلەدى. العا قويعان ماقساتتارى بارشىلىق.

«قازىرگى تاڭدا ءبىز سيىر ءسۇتىن ايەراتسيالاۋ ارقىلى قىمىز سۋسىنىن ءوندىرۋدى قولعا الدىق. ايەراتسيالاۋ - ءسۇت سەكىلدى سۇيىق ونىمدەردى اۋامەن قانىقتىرۋ پروتسەسى مەن ءادىسى. ۇلتتىق ساراپتاما ورتالىعىمەن تىعىز بايلانىس ورناتىپ، جاڭا جوباعا پاتەنت الۋعا نيەت تانىتىپ وتىرمىز. الداعى ۋاقىتتا سول ونىممەن تۇتىنۋشىلارعا ءوز ونىمدەرىمىزدى ۇسىنۋعا نيەت جاساپ وتىرمىز. سونداي- اق، سيىردىڭ قانى ارقىلى ءمۇيىزدى ءىرى قارانىڭ اۋرۋىن انىقتايتىن عىلىمي- تاجىريبەلىك جۇمىسقا ءمان بەرىپ ءجۇرمىز. ول ارقىلى مال اۋرۋىن 20 مينۋت ىشىندە انىقتاۋعا بولادى. اتاپ ايتقاندا، مالدان اۋسىل اۋرۋىن انىقتاۋدا عىلىمي- تاجىريبەلىك جۇمىستار جاسالدى»، - دەيدى بايان دۇيسەنبەك.

«ارۋ انا» كاسىپورنى وسىدان ەكى جىل بۇرىن جۇمىسىن باستادى. قازىرگى تاڭدا كاسىپورىن تۇرعىنداردى شۇبات، ايران، سۇزبە، قىمىز، ىرىمشىك، بالمۇزداق سەكىلدى ونىمدەرمەن قامتاماسىز ەتىپ وتىر.

اۆتور: ءادىلجان ۇمبەت