گەرمانيا حالقىنىڭ تورتتەن ءبىر بولىگى - شەتتەن كوشىپ كەلگەندەر
مۇنداي مالىمەتتى گ ف ر فەدەرالدى ستاتيستيكالىق بيۋروسى تاراتتى.
«2017 -جىلى گەرمانيادا تۇراتىن 19,3 ميلليونعا جۋىق ادامنىڭ شەتتەن كەلگەنى نەمەسە ءبىر كەزدەرى كوشىپ كەلگەندەردىڭ ۇرپاعى ەكەنى انىقتالدى، بۇل وتكەن جىلمەن سالىستىرعاندا 4,4 پايىزعا كوپ»، - دەپ اتاپ ءوتتى ۆەدومستۆوداعىلار.
نەمىس ستاتيستەرىنىڭ ايتۋىنشا، بەلگىلى ءبىر ادام نەمەسە ونىڭ اتا- اناسىنىڭ بىرەۋى بولسا دا، گەرمانيا ازاماتتىعىمەن تۋىلماعان بولسا، ول «شەتتەن كوشىپ كەلگەندەر» قاتارىنا جاتادى. دەگەنمەن، وسى اتالعان حالىقتىڭ 51 پايىزى وسى ۋاقىتقا دەيىن گەرمانيانىڭ ءتولقۇجاتىن الىپ ۇلگەرگەن.
«شەتتەن كەلگەندەر» توبىنا جاتاتىن جالپى حالىقتىڭ 2,8 ميلليونىنىڭ اتا تەگى - تۇرىك، 2,1 ميلليون ادامنىڭ اتا تەگى - پولياكتار. رەسەيدەن 1,4 ميلليون ادام كوشىپ كەلسە، قازاقستاننان قونىس اۋدارعان حالىقتىڭ سانى - 1,2 ميلليون.
