ەرلان ساعاديەۆ سىرتتاي وقۋدىڭ نەلىكتەن جويىلعانىن ءتۇسىندىردى

استانا. قازاقپارات - ق ر ءبىلىم جانە عىلىم ءمينيسترى ەرلان ساعاديەۆ قازاقستاندا سىرتتاي وقۋدىڭ جويىلۋى تۋرالى سۇراققا جاۋاپ بەردى، دەپ حابارلايدى قازاقپارات ءتىلشىسى.

 سۇراق مينيسترگە «اشىق ديالوگتا» قويىلعان بولاتىن.

«بۇقارالىق اقپارات قۇرالدارىندا قازاقستاندا سىرتتاي وقۋ فورماسىنىڭ جويىلاتىنى تۋرالى اقپارات تارادى. وسى راس پا؟ ەگەر راس بولسا، ەكىنشى جوعارى ءبىلىمدى الۋ ءۇشىن جانە ورتا ارناۋلى بىلىمنەن كەيىن قانشا جىل وقۋ قاجەت؟ ءقازىر سىرتتاي وقۋ كۇندىزگى وقۋعا قاراعاندا ءبىرشاما ارزان. سىرتتاي وقۋ جويىلعان سوڭ، تولەماقى قانشا بولادى؟» - دەپ جازدى اسىلجان بايماعامبەتوۆ.

ەرلان ساعاديەۆ ەلدە سىرتتاي وقۋ 2019 -جىلدىڭ 1-  قاڭتارىنان باستاپ توقتاتىلاتىنىن ايتتى. ال سىرتتاي وقىپ جۇرگەن ستۋدەنتتەر وقۋىن بىتىرگەنشە جالعاستىرا بەرمەك.

ول جاڭا زاڭناما بويىنشا جوعارى ءبىلىم باعدارلامالارىن مەڭگەرۋ مەرزىمى الىنىپ تاستالعانىن جەتكىزدى.

«سوعان سايكەس، جوعارى وقۋ ورىندارى وقىتۋ ناتيجەلەرىن ەسكەرە وتىرىپ، باكالاۆريات باعدارلاماسىن جىلدامداتىلعان رەجيمدە اياقتاۋدى كوزدەيتىن ينتەگراتسيالانعان ءبىلىم باعدارلامالارىن ازىرلەيدى»، - دەيدى مينيستر.

ق ر  ب ع م باسشىسىنىڭ ايتۋىنشا، جوعارى وقۋ ورىندارىندا اقىلى وقۋدىڭ باعاسىن رەتتەيتىن نورما دا الىپ تاستالعان.

«بۇل ازاماتتاردىڭ جوعارى ءبىلىم الۋ مۇمكىندىكتەرىن كەڭەيتۋگە باعىتتالعان. وسىعان بايلانىستى، ءبىلىم باعدارلامالارى بويىنشا وقۋ تولەماقىسىنىڭ كولەمى مەن ءبىلىم قىزمەتتەرىن كورسەتۋ شارتىنىڭ فورماسىن ەندى جوعارى وقۋ ورىندارى وزدەرى دەربەس بەكىتەدى»، - دەدى ول.