استانادا «كوشباسشى جولى. استانا» كينو ەپوپەياسىنىڭ سوڭعى ءتۇسىرىلىمى ءجۇرىپ جاتىر

استانا. قازاقپارات - استانادا «كوشباسشى جولى. استانا» كينوەپوپەياسىنىڭ سوڭعى ءتۇسىرىلىمى ءجۇرىپ جاتىر، بۇل تۋرالى فيلم رەجيسسەرى اقان ساتايەۆ ايتتى، دەپ حابارلايدى قازاقپارات ءتىلشىسى.

«كەشە استانادا فيلمنىڭ باستى كەيىپكەرلەرىمەن، انگليادان كەلگەن گريمشىلەر جانە باسقا دا ءتۇسىرىلىمنىڭ العاش كۇنىنەن باستاپ بىرگە ەڭبەكتەنگەن ماماندارمەن سوڭعى ءتۇسىرىلىم ءساتى بولدى. بايقاعانىم، ءتۇسىرىلىم اياقتالاتىن كۇن تاقاپ، قانشاما ۋاقىت بىرگە جۇمىس ىستەگەن ادامدارمەن قوشتاسۋ ءساتى جاقىنداعان سايىن قيماستىق سەزىمى كۇشەيە تۇسەدى، سەبەبى ول ادامدارمەن ايلاپ، ىستىق پەن سۋىققا قاراماستان ءتۇسىرىلىم الاڭىندا بىرگە ءجۇرىپ، بىرگە ەڭبەكتەنىپ، فيلم تۇسىردىك»، - دەپ جازدى فيلم رەجيسسەرى اقان ساتايەۆ فەيسبۋكتەگى پاراقشاسىندا.

جازبا سوڭىندا رەجيسسەر ءتۇسىرىلىم جوباسىنا قاتىسىپ، جۇمىسىن اياقتاعان بارلىق جاندارعا العىسىن ءبىلدىرىپ «كەلەسى ءتۇسىرىلىم الاڭىندا كەزدەسكەنشە» دەدى.

 ايتا كەتەيىك، بۇعان دەيىن «كوشباسشى جولى» كينوەپوپەياسىنىڭ 5 ءبولىمى قازاقستاندىقتاردىڭ نازارىنا ۇسىنىلعان بولاتىن. ال «كوشباسشى جولى. استانا» كينوتۋىندىسى وسى جىلدىڭ سوڭىندا جارىققا شىعادى دەپ جوسپارلانۋدا.

اۆتور: داۋلەت ىزتىلەۋ