تۇرىكمەنستاندا قازاقستان ساۋدا ءۇيى اشىلادى

استانا. قازاقپارات - اشحابادتا وتكەن ساۋدا-ەكونوميكالىق ميسسيا بارىسىندا قازاقستاننىڭ سىرتقى ساياسي پالاتاسى مەن ونەركاسىپ يەلەرى جانە كاسىپكەرلەر وداعى اراسىندا تۇرىكمەنستاندا قازاقستاننىڭ ساۋدا ءۇيىن اشۋ تۋرالى كەلىسىم جاسالدى، دەپ حابارلايدى قازاقپارات ءتىلشىسى.

«سونداي-اق، تاراپتار ەكى ەلدىڭ كاسىپكەرلەرى ءۇشىن كىرۋ ۆيزاسىن راسىمدەۋگە ءوزارا جاردەمدەسۋگە كەلىستى»، - دەپ ءمالىم ەتتى ق ر سىرتقى ساۋدا پالاتاسىنان.

قازاقستاندىق كومپانيالار تۇرىكمەنستان نارىعىنا ونىمدەرىن وتكىزۋگە كوپتەن بەرى قىزىعۋشىلىق تانىتىپ كەلەدى. اتالمىش ساۋدا-ەكونوميكالىق ميسسيا بۇل ەلدەگى قازاقستان ەلشىلىگىنىڭ كومەگىمەن ءوتتى. وعان ماشينا جاساۋ، قۇرىلىس، فارماتسيەۆتيكا جانە تاماق ونەركاسىبى سالالارىنداعى 16 كومپانيا قاتىستى. ولاردىڭ قاتارىندا «IT&M»، «قازفوسفات»، «قازازوت»، «كەنتاۋ ترانسفورماتور زاۋىتى»، «راحات»، «تيككۋريلا»، «قازاقستان عارىش ساپارى»، «ازيا اۆتو»، «بايان سۇلۋ»، «پورت قۇرىك» جانە ت. ب. بار.

ەلدەر اراسىندا تۋىندايتىن نەگىزگى پروبلەمالاردىڭ قاتارىنا تۇرىكمەنستاندىق ارىپتەستەر قازاقستاندىق كاسىپكەرلەرگە تولەم جاساۋ كەزىندە قيىندىقتارعا دۋشار بولىپ جاتاتىنىن جاتقىزۋعا بولادى. بۇل ماناتتى ەركىن ايىرباستاۋ مۇمكىندىگىنىڭ بولماۋىمەن بايلانىستى. سوندىقتان بىرلەسكەن جۇمىستىڭ بەلسەندىلىگىن ارتتىرىپ، ىنتىماقتاستىق ورناتۋ ماقساتىندا «KazakhExport» ا ق- نىڭ توپ-مەنەنجرلەرى «تۇرىكمەنستان» جانە «حالق بانك» مەملەكەتتىك بانكتەرىنىڭ وكىلدەرىمەن، سونداي-اق «رىزگال» كوممەرتسيالىق بانكىمەن كەلىسسوز جۇرگىزدى.

ساۋدا-ەكونوميكالىق ميسسيانىڭ ناتيجەلەرى بويىنشا، «Dolce» فارماتسيەۆتيكالىق كومپانياسى ىنتىماقتاستىق جونىندەگى ەكى مەموراندۋمعا قول قويدى. ال «بەلەس-اگرو» ج ش س «بەلەس-ماركەت» ساۋدا بەلگىسىمەن تۇرىكمەنستاعا بيىلعى جىلى ءار اي سايىن 3-4 مىڭ توننا كولەمىندە ۇن مەن وسىمدىك مايىن جەتكىزىپ تۇرۋ تۋرالى كەلىسىمشارتقا قول قويدى.