دجاكارتادا ەكى كورەيا سپورتشىلارى تۇتاس ءبىر كوماندا بولىپ جارىسقا قاتىسادى
ق ر ۇ و ك- ءنىڭ باسپا ءسوز قىزمەتى ءمالىم ەتكەندەي، سولتۇستىك كورەيانىڭ 34 ادامنان قۇرالعان (سپورتشىلار مەن باپكەرلەر) توبى بىرىككەن وقۋ-جاتتىعۋ وتكىزۋ ءۇشىن ارنايى وڭتۇستىك كورەياعا كەلگەن.
«دەلەگاتسيا قۇرامىنا 18 كانوەشى، سەگىز ەسكەك ەسۋشى، ءتورت باسكەتبولشى قىز جانە ولاردى ەرتىپ جۇرەتىن ءتورت ادام ەنگەن. ولار پحەنياننان بەيجىڭ ارقىلى ينچحون حالىقارالىق اۋەجايىنا كەلىپ، سەۋلدەن وڭتۇستىككە قاراي 150 شاقىرىمدا ورنالاسقان چحوندجۋعا كەتتى. ەكى اپتا بويى ولار چحوندجوۋدا وڭتۇستىك كورەيالىق سپورتشىلارمەن بىرلەسكەن وقۋ-جاتتىعۋ جيىندارىن وتكىزبەك»، - دەلىنگەن اتالعان حابارلامادا.
ەستەرىڭىزگە سالا كەتەيىك، اقپان ايىندا وتكەن وليمپيادا ويىندارىندا ەكى ەلدىڭ حوككەيدەن ايەلدەر كومانداسى ءبىر تۋ استىندا شىققان بولاتىن. وسى تاجىريبەدەن سوڭ سەۋل مەن پحەنيان 18- تامىز بەن 2- قىركۇيەك ارالىعىندا دجاكارتا مەن پالەمبانگ قالالارىندا وتەتىن ازيا ويىندارىنا تۇتاس ءبىر كوماندا بولىپ بارۋعا ۇيعارىپتى.
العاش رەت سولتۇستىك كورەيا مەن وڭتۇستىك كورەيا سپورتشىلارى 1991-جىلى جەنيەۆادا وتكەن ۇستەل تەننيسىنەن الەم چەمپيوناتىندا ءبىر كوماندا ەسەبىندە قاتىسىپ، ءبىر التىن، ءبىر كۇمىس جانە ەكى قولا مەدال جەڭىپ العان بولاتىن.
اۆتور: كۇنسۇلتان وتارباي
