قارماقشىلىق شەبەر مۇيىزدەن ءمۇسىن جاسايدى

قازالى. قازاقپارات -  قىزىلوردا وبلىسى قارماقشى اۋدانىنىڭ تۇرعىنى سامالبەك بۋرابايەۆ مۇيىزدەن مۇسىندەر جاسايدى، دەپ حابارلايدى قازاقپارات ءتىلشىسى.

شەبەردىڭ ايتۋىنشا، ابدەن تازالانىپ، سۋعا قايناتىلعان مۇيىزدەن كوزدىڭ جاۋىن الار جان-جانۋارلاردىڭ، قۇستاردىڭ مۇسىندەرىن جاسالادى.

«قارماقشىداعى مەكتەپتە ەڭبەك پانىنەن ساباق بەرەمىن. قولونەرمەن اينالىسۋ ءۇشىن ەڭ اۋەلى ىنتا-جىگەر مەن ەپتىلىك قاجەت. ءمۇيىزدى وڭدەۋ ءۇشىن ءبىر جەتىدەي ۋاقىت كەتەدى. سۋعا سالىپ، ءجىبىتىپ الامىن. سودان كەيىن ىستىق سۋعا قايناتىپ نەمەسە ىستىق قولامتاعا سالىپ بالقىتىپ السا، كەسىپ، جونۋعا جەڭىل. مۇنداي جۇمساعان، بالبىراعان ءمۇيىزدى يۋگە، قالىپقا قىسىپ كەز كەلگەن پىشىنگە كەلتىرۋ وڭاي. بابىنا كەلىپ تۇرعان كەزىندە پىشاقپەن ەركىن جونا بەرۋگە بولادى»، - دەيدى شەبەر.

مۇيىزدەن ءمۇسىن جاسايتىن شەبەر وزىنە ءمالىم ونەر تۋرالى كىتاپ جازعىسى دا كەلەدى.

«اكەم ەر-تۇرمان، ەر-توقىم، قامشى جاسايتىن. قولونەرگە ىقىلاسىمنىڭ ويانعانى سودان بولسا كەرەك. مەن مۇيىزدەن ءتۇرلى بۇيىم جاساۋعا ماشىقتاندىم. بۇگىندە وقۋشىلارعا ەڭبەك پانىنەن ساباق بەرەمىن ءارى قولونەر بۇيىمدارىن ازىرلەۋگە باۋلىپ كەلەمىن. بالالاردىڭ دا قىزىعۋشىلىعى جوعارى»، - دەيدى شەبەر.

بۇگىندە قولونەرشىنىڭ قولىنان شىققان دۇنيەلەر جۇرتشىلىققا كەڭ تانىلعان. تاپسىرىس بەرۋشىلەرى كوبەيگەن. ءبىر ءمۇسىننىڭ باعاسى 3 مىڭ تەڭگە مەن 30 مىڭ تەڭگەنىڭ ارالىعىندا ساتىلادى.

ايتا كەتەيىك، س. بۋرابايەۆتىڭ جاساعان مۇسىندەرى قورقىت اتا ەتنواۋىلى مۇراجايىندا، ەكسپو-2017 كورمەسىندە كوپشىلىكتىڭ نازارىنا ۇسىنىلعان بولاتىن.