قايرات نۇرتاستىڭ قىزدارى سەريالعا ءتۇسىپ جاتىر

استانا. قازاقپارات - سوڭعى كەزدەرى تۇرىك پەن ءۇندىنىڭ شىم- شىتىرىق حيكايالارى ۇلتتىق ارنالاردى جاۋلاپ العانداي. الايدا، وتاندىق ارنالاردا كورسەتىلىپ جۇرگەن وتاندىق تەلەحيكايالار دا از ەمەس. كۇن سايىن سانى دا، ساپاسى دا ارتىپ كەلەدى.

كەزەكتى تەلەسەريالدىڭ اتاۋى - «قارلىعاش ۇيا سالعاندا» دەپ اتالادى. اتالمىش تۋىندىنىڭ پروديۋسەرى بىلىكتى جۋرناليست گۇلنۇر ماماساريپوۆا حانىم.

وتاندىق ارنالاردىڭ ءبىرى ارقىلى كورەرمەنگە كورسەتىلەتىن حيكايانىڭ باستى كەيىپكەرلەرى دە تانىمال جۇلدىزدار.

كورەرمەن كوزايىمىنا اينالعان اكتەر ەركەبۇلان دايىروۆ پەن جاندوس ايباسوۆتى جاڭا وبرازدا كورە الاسىزدار. ال، باستى رولدەگى كەلىنشەكتىڭ ءرولىن سومداۋ باقىتى ءانشى، تەلەجۇرگىزۋشى، اكتريسا كامشات جولدىبايەۆاعا بۇيىرعان.

ءبارىن ايت تا، ءبىرىن ايت. بۇل تەلەحيكاياداعى كىشكەنتاي حانشايىمداردىڭ ءرولىنىڭ ءبىرىن قايرات پەن جۇلدىزدىڭ ەكىنشى قىزدارى الاۋ وينايدى. بۇعان دەيىن وتاناسى ءوزىنىڭ پاراقشاسىندا تۇڭعىشى سەزىمنىڭ فورتەپيانوعا جاقىن ەكەندىگىن، نارۇلدىڭ انگە اۋەستىگىن، ودان بولەك ۇل - قىزدارىنىڭ مودەل رەتىندە پوديۋمدا ءجۇرىپ وتكەن ۆيدەولارىن جۇكتەگەن ەدى.

ال، وتباسىنداعى جاڭا جۇلدىزدىڭ قادامىنا پروديۋسەر اجەسى ءدان ريزا. بۇل تۇرعىدا گۇلزيرا ۇسەن قىزى: «مەن نەمەرەلەرىمنىڭ ءار قادامىن قولدايمىن. نەمەرەنىڭ ءار قىلىعى ءتاتتى، ءار ونەرى ىستىق قوي. باستىسى، قۇلىندارىمدى اللا ءتىل- كوزدەن ساقتاسىن دەپ تىلەيمىن. باعاسىن ۋاقىتى كەلگەندە كورەرمەن ءوزى بەرەر. ال، ءوز باسىم الاۋىمنىڭ العىرلىعىنا ەش كۇمان كەلتىرمەيمىن. كەرەمەت ويناپ، شىعارماشىلىق توپتىڭ دا، اتا- اناسىنىڭ دا، ءبىزدىڭ دە، كورەرمەننىڭ دە ءۇمىتىن اقتايدى دەپ سەنەمىن»، - دەپ ءوز ويىن ءبىلدىردى.

بىزدە جۇلدىزدار شوعىرلانعان تەلەحيكايانىڭ جۇلدىزى جارىق بولادى دەپ سەنەمىز.

دەرەككوز: comode